बन्दसत्रमा 'घोषणा गर्ने' नामावली तयार गर्दै ओली टिम

काठमाडौं- नेकपा एमालेका अध्यक्ष केपी शर्मा ओलीले एमाले पदाधिकारी र केन्द्रीय सदस्यको नाम घोषणा गर्नुअघि छलफल थालेका छन्। पार्टीमा आफू निकटका नेताहरूसँग उनले सौराहामा आफू बसेको होटल पार्क सफारीमा छलफल गरिहरेका छन्। 

पार्टीमा सबैलाई मिलाएर सर्वसम्मति हुने गरी नेता र पदाधिकारीमा नाम घोषणा गर्ने तयारी गरिएको छ। बन्द सत्रमा नाम घोषणा गरी तालि बजाएर पारित गराउने तयारी ओली पक्षको छ। 

अध्यक्षमा सर्वसम्मत भएर दोहोरिने ओलीको महत्वाकांक्षालाई भीम रावलले चुनौती दिएका छन्। उनी आफू निर्वाचनमा लड्ने बताउँदै आएका छन्। 

नेकपा एमालेमा ओली निकटका मानिने खगराज बरालले ९९ प्रतिशत सहमति भइसकेको दाबी गरेका थिए। उनले पार्टीमा ओलीलाई नमान्नेहरूले पार्टीलाई पनि सिद्ध्याउने र आफू पनि सिद्धिने चेतावनी समेत दिएका थिए। 

ओलीले पूर्व माओवादीलाई दुई पदाधिकारी र ४० जना केन्द्रीय सदस्यीय दिने सहमत भएका छन्। यस्तै दुई जना स्थायी कमिटी सदस्यसमेत दिने तयारी गरिएको बताइएको छ।