समाजवादको ठोस कार्यक्रम बनाउन घनश्याम भुसालको अपिल

एमाले नेता घनश्याम भुसालले दलाल पुँजीवादको विरुद्ध राष्ट्रिय पुँजीको विकास गर्दै समाजवादको तयारी गर्ने ठोस कार्यक्रम बनाउन अपिल गरेका छन्।

नेपाल समय | आइतबार, मंसिर १२, २०७८

नेपाल समय

आइतबार, मंसिर १२, २०७८

समाजवादको ठोस कार्यक्रम बनाउन घनश्याम भुसालको अपिल

काठमाडौं– एमाले नेता घनश्याम भुसालले दलाल पुँजीवादको विरुद्ध राष्ट्रिय पुँजीको विकास गर्दै समाजवादको तयारी गर्ने ठोस कार्यक्रम बनाउन अपिल गरेका छन्।

उनले एमाले सैद्धान्तिक रुपमा ठिक ठाउँमा रहेको र एमालेको सिद्धान्त नै सबै पार्टीको कार्यदिशा बनेको अपिलमा उल्लेख गरेका छन्। भुसालले भनेका छन्, ‘संगठनका हिसाबले एमालेको अर्को कुनै जोडा छैन। इतिहासको गौरव र राष्ट्रिय तथा अन्तर्राष्ट्रिय प्रतिष्ठाका हिसाबले हामी अतुलनीय छौं।’

उनले पार्टीको सिद्धान्त र कार्यदिशा सही भए पनि कार्यान्वयन गर्ने संगठनात्मक व्यवस्थामा असंगति रहेको औंल्याएका छन्। उनले भनेका छन्, ‘एमालेको पुनरोदयका लागि ती असंगति हटाउनैपर्छ, त्यसका आधारमा कम्युनिस्ट आन्दोलनलाई एकीकृत गर्नैपर्छ।’

भुसालले विभाजनको पीडा र गुटबन्दीको नसामा परेका एमालेका लाखौं सदस्यले पार्टी फेरि ब्युँझन्छ भनेर महाधिवेशनतर्फ हेरिरहेकाले त्यसतर्फ संवेदनशील बन्न नेतृत्वलाई आग्रह गरेका छन्। उनले भनेका छन्, ‘हाम्रा सफलतामा गौरव गर्ने र हाम्रा असफलतामा दुःखी हुने दुनियाँभरिका कम्युनिस्ट, प्रैगतिशील, वामपन्थी तथा सामाजिक न्याय र समानताका पक्षधहरुले हामी फेरि उठेको र सफल हुँदै गएको देख्न चाहन्छन्।’

प्रकाशित: Nov 28, 2021| 12:28 आइतबार, मंसिर १२, २०७८