गठबन्धनमा छलफल गरेर न्यायालयको विवाद निकासको पहल गर्छु : प्रधानमन्त्री देउवा

काठमाडौं- प्रधानमन्त्री शेरबहादुर देउवाले न्यायालयको विवादको निकासका विषयमा पाँचदलीय गठबन्धनले चाडै निर्णय गर्ने बताएका छन्।

नेपाल बार एशोसिएसनका पदाधिकारीसँग बालुवाटारमा आज बिहान भएको भेटमा उनले सरकारले यस विषयमा चाडै निर्णय गर्ने बताएका हुन्। प्रधानमन्त्री देउवा र नेपाल बार एसोसिएसनका पदाधिकारीबीच शुक्रबार बिहान बालुवाटारमा करिब आधा घण्टा छलफल भएको थियो।

बार अध्यक्ष चेण्डेश्वर श्रेष्ठले आफूहरूले प्रधानमन्त्रीलाई भेटेर न्यायालयमा चोलेन्द्र शमसेर जबराले गरेका कामकारबाही बारे जानकारी दिएको बताएका छन्। उनले प्रधानन्यायाधीशले गरेका भ्रष्टाचारका उदाहरणसमेत दिएको बताए। 

'हामी सबैका कुरा सुनेपछि प्रधानमन्त्रीज्युले न्यायालयमा अहिले भइरहेको अवस्थाबारे सबै जानकारी रहेको बताउनु भयो। उहाँले एकदुईदिनमै सत्तारूढ गठबन्धनको बैठक बोलाएर निर्णय गर्छौं भन्नुभएको छ,' उनले भने।

छलफलका क्रममा मङ्सिर ६ गते बारले सभामुख र राजनीतिक दलको संसदीय दलको कार्यालयमा बुझाएको ज्ञापनपत्र प्रधानमन्त्रीलाई पनि बुझाएको थियो । 

बारका पदाधिकारीसँगै पूर्व सभामुख दमननाथ ढुंगाना, वरिष्ठ अधिवक्ता बद्रीबहादुर कार्की, हरिहर दाहाल, शम्भु थापा, प्रेमबहादुर खड्काहरूले पनि प्रधानमन्त्री समक्ष आफ्नो कुरा राखेका थिए।