यू–१९ राष्ट्रिय क्रिकेटमा बागमती र कर्णालीको जित

काठमाडौं- यू–१९ पुरुष राष्ट्रिय एकदिवसीय क्रिकेट प्रतियोगिताअन्तर्गत बुधबार सम्पन्न खेलमा बागमती  र कर्णाली प्रदेशले जित निकालेका छन्। 

कीर्तिपुरस्थित त्रिभुवन विश्वविद्यालयको मैदानमा सम्पन्न खेलमा कर्णालीले लुम्बिनीलाई १४० रनले हराएको छ। कर्णालीले ५० ओभरमा ८ विकेट गुमाएर २३२ रन जोडेको थियो। जवाफमा लुम्बनी २३.५ ओभरमै अलआउट भएर ९२ रन मात्र बनाएपछि कर्णालीले सानदार जित निकालेको हो।

कर्णालीका सुवास एयरले ७६ र निश्चल रावलले ४४ रन बनाए। त्यसक्रममा लुम्बिनीका दुर्गेश गुप्तानले ४ विकेट लिए।

लुम्बिनीका प्रज्वल थापाले सर्वाधिक २८ रन बनाए। यता कर्णालीका प्रकाश जैसीले ५ विकेट लिए।

त्यस्तै मूलपानीमा सम्पन्न खेलमा बागमती प्रदेशले गण्डकी प्रदेशलाई हराएको हो। जहाँ विवेक राना मगरले १११ बलमा ८९ रनको सानदार पारी खेले। त्यस्तै, प्रतीश जिसीले २७ रन र प्रतिक श्रेष्ठले १७ रन बनाए। बाग्मतिले ४८.५ ओभरमा २१३ रन बनाएको थियो।

यता गण्डकीका सुदीप अर्याल, कमल परियार र अभिषेक थापाले समान ३–३ विकेट गिराए।

जवाफमा अर्जुन कुमालले ५५ रन बनाए भने सुजन गौतम र अभाष भण्डारीले समान १३–१३ रन जोडे। त्यसबाहेक अन्य खेलाडीले जोर अंकमा रन बनाउन सकेनन्।

४३ ओभर तीन बल मैदानमा टिमेको गण्डकीमाथि बाग्मतिका प्रतिस जिसी र तिलक बहादुर भण्डारीले समान ३–३ विकेट लिए।