प्रशंसा र सुनिराले जिते लन टेनिसमा स्वर्ण

काठमाडौं– नेपालका प्रशंसा मोक्तान र सुनिरा थापाको जोडीले काठमाडौं–एसियन यु–१४ र्‍याङकिङ टेनिस प्रतियोगिताअन्तर्गत सर्किट–२ को महिला युगलतर्फ बुधबार स्वर्ण जितेका छन्।

सादोबाटोस्थित टेनिस कोर्टमा भएको फाइनलमा प्रशंसा र सुनिराको जोडीले नेपालका समृद्धि महर्जन र आध्या पौडेलको जोडीलाई ६–४ र ६–३ को सोझो सेटमा पराजित गर्दै स्वर्ण हात पारेका हुन्। प्रशंसा र सुनिराको जोडी सर्किट– १ को पनि विजेता हुन्।

उक्त स्पर्धाको पुरुषतर्फको प्रतियोगितामा नेपालकै सक्षमविक्रम शाह र दर्शिल श्रेष्ठको जोडी च्याम्पियन बने। सक्षम र दर्शिलको जोडीले नेपालका श्रीयोग अधिकारी र भारतका सिद्धार्थ जिबुको जोडीलाई ६–२ र ६–२ को सीधा सेटमा  हराएका हुन्।

सक्षमले पनि सर्किट– १ को युगतमा जित सेयर गरी स्वर्ण जितेका थिए। त्यसबेला सक्षमले नेपालका आयुशमान हजुर घलेसँग मिलेर खेलेका थिए।

पुरुष एकलमा नेपालका सक्षमविक्रम शाहले पाकिस्तानका अमिर मुहम्मद खान मजारीलाई ६–३ र ६–१ तथा नेपालका दर्शिल श्रेष्ठले भारतका सिद्धार्थ जिबुलाई ६–१ र ६–१ को सोझो सेटमा पाखा लगाउदै फाइनलमा पुगेका थिए।

प्रतियोगितामा महिलातर्फ नेपालकी सुनिरा थापाले नेपालकै आध्या पौडेललाई ६–३ र ७–५ तथा नेपालकी प्रशंसा मोक्तानले अमेरिकाकी नाला जोस्फिन मास्केलाई ६–१ र ६–० को सीधा सेटमा पन्छाउँदै फाइनल भिडन्त पक्का गरे। एकलतर्फको फाइनल बिहीबार हुनेछ।