फ्रान्स र उरुग्वेको भिडन्त आज : को पुग्ला सेमिफाइनलमा ?

काठमाडौं- रुसमा जारी फिफा विश्वकप फुटबल प्रतियोगिता अन्तर्गत शुक्रबारबाट क्वाटर फाइनलका खेलहरु सुरु हुँदैछन् । 

शुक्रबार हुने पहिलो क्वाटर फाइनल खेलमा फ्रान्स र उरुग्वेबीच भिडन्त हुँदा दोस्रो खेलमा ब्राजिलविरुद्ध बेल्जियम मैदानमा उत्रिने छन् । पहिलो खेल नेपाली समयअनुसार बेलुका पौनै ८ बजे हुनेछ भने दोस्रो खेल राती पौने १२ बजे हुनेछ । 

रसियाको निज्हनी नोभ्गोरोड रंगशालामा हुने फ्रान्स र उरुग्वेबीचको खेल निकै रोचक हुने अनुमान गरिएको छ । यी दुई टोलीको खेलालाई धेरैले उरुग्वे रक्षात्मक र फ्रान्स आक्रामक बन्न सक्ने अनुमान गरेका छन् । 

दुबै टिम जित हात पार्दै सेमिफाइनलमा प्रवेश गर्ने दाउमा छन् । फुटबलमा बराबरी जस्तै हैसियत राख्ने यी दुईटोलीमा जो विजेता बन्छ उसले सेमिफाइनलमा ब्रजिल र बेल्जियमबीचको खेलबाट विजयी भएर आउने टिमसंग खेल्ने छ । 

समूह चरण अन्तर्गत खेलेका तीनवटै खेलमा विजयी भएको उरुग्वेले प्रि–क्वाटरफाइनलमा पोर्चुगललाई २–१ ले पराजित गर्दै क्वार्टरफाइनलमा फ्रान्ससँगको भेट पक्का गरेको हो । उरुग्वेले प्रतियोगितामा हालसम्म विपक्षी टोलीबाट एक मात्रै गोल खाएको छ भने कुल ७ गोल गरेको छ । 

निकै लयमा देखिएको फ्रान्सले भने समुह चरणको दुई खेलमा जीत र एकमा बराबरीको नतिजा निकालेको थियो । प्रि–क्वाटरफाइनलमा भने उपाधि दाबेदार मानिएको अर्जेन्टिनालाई ४–३ को नमिठो हार चखाउँदै फ्रान्स क्वाटफाइनलमा पुगेको हो । उसले जारी विश्वकपमा ७ गोल गरेको छ भने ४ गोल खाएको छ । फ्रान्सको आक्रामक खेल शैली उसको बलियो पक्ष मानिएको छ ।

सन् १९३० र १९५० मा गरी दुईपटक विश्वविजेता बनेको उरुग्वे सन् २०१० को विश्वकपमा सेमिफाइनलसम्म पुगेको थियो भने सन् २०१४ को विश्वकपमा भने प्रिक्वाटरफाइनलबाटै बाहिरिएको थियो । सन् १९९८ को विश्व च्याम्पियन फ्रान्स सन् २०१० को विश्वकपमा समूह चरणबाटै बाहिरिएको थियो भने २०१४ को विश्वकपमा क्वाटरफाइनलसम्म पुगेको थियो ।

यी दुई टिमबीच विश्वकपमा पछिल्लो पटक भेट भने सन् २०१० मा भएको थियो । जहाँ समूह ए बाट उरुग्वे विजेता बन्दै नकआउट चरणमा प्रवेश गर्दा यसै समूहमा रहेको फ्रान्स समूह चरणबाटै बाहिरिएको थियो । यी दुई टिमले समूह चरणको खेलमा भने गोलरहित बराबरी खेलेका थिए ।