अवैध अधिवेशनमार्फत ठेकेदारलाई सभापति बनाएको भन्दै डडेल्धुरामा विरोध प्रदर्शन

डडेल्धुरा- प्रधानमन्त्रीसमेत रहेका नेपाल कांग्रेसका सभापति शेरबहादुर देउवाको गृहजिल्ला डडेल्धुराका अवैधरुपमा अधिवेशन गराएर ठेकेदारलाई सभापति चयन गरेको भन्दै विरोध प्रदर्शन गरिएको छ। 

डडेल्धुरामा सोमबार जिल्ला अधिवेशन भएको थियो। अधिवेशनबाट परशुराम नगरपालिकाका नगर प्रमुखसमेत रहेका ठेकेदार भीमबहादुर साउद सभापति बनेका छन्। पैसाको आडमा राजनीतिक गरेको र राजनीतिक पहुँचको आधारमा विभिन्‍न ठाउँमा ठेक्का लिएर काम अलपत्र पार्ने व्यक्तिलाई जिल्ला सभापति बनाएको भन्दै विरोध प्रदर्शन गरिएको छ।

डडेल्धुरामा साउदलाई सभापति बनाउनका लागि विरोधीहरुको क्रियाशील सदस्यता नै काटि दिएपछि विवाद सुरु भएको थियो। उक्त विवादका बीच निर्वतमान जिल्ला सभापति कर्ण मल्ला समूहलाई बाइपास गर्दे प्रहरीको घेराभित्र वडा अधिवेशन गराइएको थियो। 

सबै प्रक्रियाहरु मिचेर वडा सभापति र जिल्ला सभापतिको अनुपस्थितिमा जिल्ला अधिवेशन गराएको र पार्टीलाई ठेकेदारको जिम्मा लगाएको भन्दै मंगलबार जिल्ला सदरमुकाममा मोटरसाइकल र्‍याली निकालेको हो।

मल्ल पक्षका नेता कार्यकर्ताले कालो झण्डासहित ठेकेदार साउँद र केन्द्रीय सभापति देउवाविरुद्ध चर्का नारा लगाउँदै मोटरसाइकल र्‍याली निकालेका हुन्। 

निवर्तमान सभापति मल्लले जिल्लामा भएका सबै अधिवेशन अवैध भएको दाबी गर्दै केन्द्रीय निर्वाचन समितिमा उजुरी दर्ता गराइसकेका छन्। सभापति मल्ललगायत नेता कार्यकर्ता मंसिर १ गतेदेखि राजधानी काठमाडौंस्थित कांग्रेसको मुख्यालय सानेपामा अनसन बसिरहेका छन्।