कञ्‍चनपुरका जिल्ला सभापति र संविधानसभा सदस्य महाधिवेशन प्रतिनिधिमा पराजित

काठमाडौं- कञ्‍चनपुरका जिल्ला सभापति हरि बोहरा र संविधानसभा सदस्य बलदेव बोहरा महाधिवेशन प्रतिनिधिमा पराजित भएका छन्। कञ्‍चनपुरको क्षेत्र नम्बर २ मा महाधिवेशन प्रतिनिधिका लागि निर्वाचनमा प्रतिस्पर्धा गरेका बोहराद्वयसहितका नेताहरु महाधिवेशन प्रतिनिधिमा पराजित भएका हुन्। 

कञ्‍चनपुरमा सभापति शेरबहादुर देउवा समूहकै दुई नेताहरु एनपी साउँद र रमेश लेखकले प्यानल नै बनाएर उम्मेदवारी दिन लगाएका थिए। कञ्‍चनपुरको क्षेत्र नम्बर २ मा लेखक प्यानल क्लिनस्विप भएको हो। 

महाधिवेशन प्रतिनिधिमा पराजित हुनेमा लेखक समूहका कांग्रेस कञ्चनपुरका पूर्वसचिव भोजराज बोहरा, नेपाल शिक्षक संघका पूर्वकेन्द्रीय उपाध्यक्ष सिद्धराज भट्ट पनि छन्। 

क्षेत्र नम्बर २ का कुल ५०८ मतदातामध्ये ५०४ मत खसेको थियो। जसमा दुई मत बदर भए भने ५०२ मत सदर भएका थिए। 

मंगलबार सार्वजनिक भएको अन्तिम मतपरिणाम अनुसार सभापति बोहराले २४४ मत ल्याएका थिए भने बलदेव बोहराले १९०, भोज बोहराले २१३ र सिद्धराज भट्टले २०६ मत ल्याएका थिए। 

वर्तमान सभापति बोहरा आगामी महाधिवेशनमा पनि लेखक समूहबाट जिल्ला सभापतिका आकांक्षी थिए। त्यसैगरी कञ्‍चनपुरको क्षेत्र नम्बर १ बाट जिल्ला उपसभापति बन्धु राना र कञ्‍चनपुर क्षेत्र नम्बर ३ बा जिल्ला सचिव ईश्‍वरी जोशी पनि महाधिवेशन प्रतिनिधिमा पराजित भएका छन्। 

कञ्चनपुर–२ बाट खुलातर्फ संविधानसभा सदस्य बहादुरसिंह थापा, चिन्तामणि भट्ट, हेमराज ओझा, दलबहादुर बोहरा, लोगबहादुर देउवा, पुस्करराज ओझा, दुर्गाप्रसाद भट्ट, मीनबहादुर सिंह, उद्धव बोहरा र टीका बैज महाधिवेशन प्रतिनिधिमा निर्वाचित भएका छन्।