धनुषामा कांग्रेसको पालिका अधिवेशन आइतवार हुने, सर्लाहीका निर्वाचन अधिकृतले दिए राजीनामा

जनकपुरधाम- धनुषामा स्थगित भएको कांग्रेसको पालिकाको निर्वाचन आइतबार हुने भएको छ। शुक्रबार निर्वाचन अधिकृत अरूण ज्ञवालीले सूचना प्रकाशन गरी मंसिर ४ र ६ गतेका लागि तय गरिएको पालिका तथा प्रदेश क्षेत्रीय अधिवेशन तत्कालका लागि प्राविधिक कारणले स्थगित गरिएको जनाएको थियो।

सूचना प्रकाशनको २४ घण्टा नबित्दै स्थगित गरिएको निर्वाचनमध्ये पालिकास्तरीय निर्वाचन आइतबार हुने शनिबार एक सूचनामार्फत जनाइएको छ।

पालिकास्तरीय मतदाताको नामावलीको प्राविधिक कार्य पूरा भइसकेको कारण निर्वाचनको मिति तय गरिएको उनले बताए। निर्वाचन सम्पन्‍न भएपछि क्षेत्रीय मतदाताको नामावली प्रकाशनको कार्य सम्पन्‍न भए लगत्तै प्रदेश सभा क्षेत्रीय निर्वाचनको मिति तय गरिने उनले बताएका छन्।

यसअघि पालिकाको निर्वाचन मंसिर ४ र क्षेत्रीय मंसिर ६ गतेका लागि मिति तय गरिएको थियो। उनका अनुसार जिल्लाका चार निर्वाचन क्षेत्रमध्ये २ र ४ मा सहमति नपुगेर मतदाता क्षेत्रीय प्रतिनिधिको नामावली आउन नसक्दा कम्प्युटरको सफ्टवेयर लोड गर्न बाँकी रहेको छ।

सर्लाहीका निर्वाचन अधिकृतले दिए राजीनामा

यता सर्लाही विवाद बढ्दै गएपछि दोस्रोपटक निर्वाचन अधिकृतले राजीनामा दिएका छन्। बिहीबार निर्वाचन अधिकृतलाई नै कुटपिट गरेपछि निर्वाचन अधिकृत दिवाकरराज पाण्डेले राजीनामा दिएका हुन्।

पहिलोपटक खटाइएको निर्वाचन अधिकृत विनोद कार्की दुई पक्षको विवादले अधिवेशन गराउन नसक्ने भन्दै गत कात्तिक २६ गते राजीनामा दिएका थिए। त्यसपछि केन्द्रीय निर्वाचन समितिले कात्तिक २७ गते पाण्डेलाई नयाँ निर्वाचन अधिकृतको रूपमा सर्लाही पठाएको थियो। तर, कुटपिटपश्चात् उनले पनि राजीनामा दिएका हुन्।