प्रधानन्यायाधीशलाई बारको जवाफ- वार्ताका नाममा जालझेल छाडेर राजीनामा दिनूस्

काठमाडौं- प्रधानन्यायाधीश चोलेन्द्रशम्शेर जबराले वार्ताका लागि गरेको प्रस्तावलाई नेपाल बार एशोसिएसनले अस्वीकार गरेको छ। 

जबराले वार्तामा आउन आग्रह गर्दै शुक्रबार दिउँसो बार अध्यक्ष चण्डेश्वर श्रेष्ठलाई पत्र पठाएका थिए। सो पत्रको जवाफ दिँदै बारले वार्ताका नाममा जालझेल गर्न छाडेर राजीनामा दिन प्रधानन्यायाधीशलाई आग्रह गरेको हो।

यस्तै शुक्रबार बसेको बारको बैठकले आन्दोलनका थप कार्यक्रम घोषणा गरेको छ। आइतबार देशभरका अदालतमा कानुन व्यवसायीहरुले बहस पैरवी नगर्ने निर्णय गरेको महासचिव लीलामणि पौडेलले जानकारी दिए। उनका अनुसार सोमबार संसदमा प्रतिनिधित्व गर्ने दललाई ज्ञापनपत्र र प्रधानन्यायाधीश जबरामाथिको आरोपपत्र बुझाइनेछ।

मंगलबार कानून व्यवसायीहरुले देशभरका अदालतमा कुनै पनि मुद्दा दर्ता नगरी सांकेतिक विरोध गर्नेछन्। तर हदम्यादको अन्तिम दिन भएका मुद्दा भने दर्ता गर्न छुट दिने निर्णय भएको छ।

बुधबार केन्द्रीय बारबाट प्रतिनिधि पठाई उच्च अदालत केन्द्रित धर्ना हुनेछ भने बिहीबार र शुक्रबार सर्वोच्च अदालत केन्द्रित धर्ना हुनेछ।

साथै सर्वोच्च अदालतमा प्रदर्शनलाई निरन्तरता दिने बार एशोसिएसनले बताएको छ।