कैलालीका सबै पालिकामा सभापति चुनिए, धनगढीमा अन्य पदमा सहमतिको प्रयास

धनगढी- नेपाली कांग्रेस कैलालीको सबै पालिकामा सभापति निर्वाचित भएका छन्। नेपाली कांग्रेस कैलालीको बुधबार सम्पन्न पालिका निर्वाचनमा एक उपमहानगर, ६ नगर र ६ गाउँपालिकामा सभापति निर्वाचित भएका हुन्।

१३ पालिका रहेको कैलालीमा केहीमा सर्वसम्मत र केहीमा निर्वाचनमार्फत नयाँ नेतृत्व चयन भएको नेपाली कांग्रेस कैलालीले जनाएको छ।

नेपाली कांग्रेस कैलालीका सभापति नरनारायण शाह ‘मनु’ का अनुसार धनगढी उपमहानगरपालिकामा यज्ञराज उपाध्याय, टीकापुर नगरपालिकामा नरेश खत्री, गौरीगंगा नगरपालिकामा पहलविक्रम चन्द, लम्कीचुहा नगरपालिकामा इन्द्र कुँवर, भजनी नगरपालिकामा नवराज मिश्र, गोदावरी नगरपालिकामा वीरबहादुर चोखाल, घोडाघोडी नगरपालिकामा बमबहादुर सिंह निर्वाचित भएका छन्।

यस्तै चुरे गाउँपालिकामा हेम शाह, जानकी गाउँपालिकामा गणेश रेग्मी, वर्दगोरीया गाउँपालिकामा कृष्ण विष्ट, कैलारी गाउँपालिकामा कृष्णप्रसाद चौधरी, मोहन्याल गाउँपालिकामा कमल साउँद र जोशीपुर गाउँपालिका सभापतिमा बंशराम चौधरी निर्वाचित भएका छन्। 

सुदूरपश्चिमको एक मात्र उपमहानगरपालिका धनगढीको सभापतिमा यज्ञराज उपाध्याय निर्विरोध निर्वाचित भए पनि अन्य पदमा भने सहमति हुन सकेको छैन। 

३८ जना सदस्य आवश्यक भए पनि ४८ जनाको उम्मेदवारी परेको छ। उपसभापतिमा दुई जना हुनुपर्ने भए पनि ६ जनाको उम्मेदवारी परेको छ। सचिवमा ८ जना र सहसचिवमा ७ जनाको उम्मेदवारी परेको छ। सचिव र सहसचिव दुई/दुई जना रहने विधानमा व्यवस्था छ।