सहमतिमै पार्टीको नेतृत्व चयन हुन्छ, प्यानल बन्दैन : ईश्वर पोखरेल

काठमाडौं- नेकपा एमालेका महासचिव ईश्वर पोखरेलले पार्टीको नेतृत्व सहमतिमा नै चयन हुने बताएका छन्। 

महासचिव पोखरेलले पार्टीको १० औं महाधिवेशनमा नेतृत्व चयनका लागि हुने निर्वाचनमा प्यानल नबन्‍ने दावीसमेत गरे। काठमाडौंमा बुधबार आयोजित ‘पार्टीको १० औं राष्ट्रिय महाधिवेशन जनपरिचालन अभिमुखिकरण’ कार्यक्रममा बोल्दै उनले नेतृत्व चयनका लागि हुने निर्वाचनमा प्यानलको लिष्ट नबाँडनेसमेत बताएका छन्। उनले पार्टीलाई एकतावद्ध बनाएर लैजान पनि प्यानलको लिस्ट बाँडेर महाधिवेशनको निर्वाचनमा सामेल हुने पक्षमा आफूहरु नरहेको तर्क गरेका छन्। 

उनले एमालेले उठान गर्दै आएको समृद्धि र विकासको मुद्दालाई निर्णायक ठाउँमा पुर्‍याउने गरी महाधिवेशनलाई भव्यताका साथ सफल बनाउने दावी समेत गरेका छन्। 

महासचिव पोखरेलले भने, ‘हाम्रो नेतृत्व भनेको सहमतिका साथ निर्माण हुन्छ। एउटा कुरा बुझ्नुस्, कमरेडहरु, महाधिवेशनमा हाम्रो प्यानल बन्‍ने छैन। प्यानल लिस्ट बाँडिने छैन। यो चिज ग्यारेन्टी हो। व्यक्तिगत हिसाबले को साथीलाई मत दिनुहुन्छ, दिनुहुन्छ। हामी पार्टीलाई त्यसरी एकतावद्ध बनाएर लैजान चाहन्छौं। र यस्तो एमाले, जसले दलाल पूँजीको विरोध गर्दै समाजवादको आधार निर्माण गर्ने र आर्थिक समृद्धि र विकासको जुन मुद्दा हो, त्यो मुद्दालाई निर्णायक ठाउँमा पुर्‍याउने काम गर्नेछ।’

महासचिव पोखरेलले चितवनमा हुने सो महाधिवेशनमा लाखौंको संख्यामा जनसहभागिता हुने दाबीसमेत गरेका छन्। उनले महाधिवेशनलाई सफलतापूर्वक सम्पन्‍न गराउने काममा केन्द्रित हुन सिंगो पार्टी पंक्तिलाई आह्वान समेत गरेका छन्।