प्रदेश १ बाट विप्लव समूहका २३ कार्यकर्ता पक्राउ

विराटनगर–  प्रदेश १ का विभिन्‍न स्थानबाट नेत्र विक्रम चन्द विप्लव नेतृत्वको नेपाल कम्युनिस्ट पार्टीका करिब दुई दर्जन कार्यकर्ता पक्राउ परेका छन्। 

मंगलबार बिहानदेखि बन्द गराउँदै हिँड्ने विप्लव समूहका कार्यकर्ताहरुलाई प्रहरीले पक्राउ गरेको हो। सुनसरी र इलामबाट २३ जना व्यक्तिलाई प्रहरीले पक्राउ गरेको प्रदेश प्रहरी कार्यालय विराटनगरले जनाएका छ। 

प्रदेश प्रहरी कार्यालय विराटनगरका प्रवक्ता एसपी नवीनराज राईले बन्दको आह्वान गर्दै सडकमा निस्किएका २३ जना विप्लव कार्यकर्तालाई पक्राउ गरिएको जानकारी दिए। उनका अनुसार इटहरीबाट २१ र इलामबाट २ जना पक्राउ परेका हुन्। 

उदयपुरको गाईघाटमा सवारीसाधन बन्दको आह्वान गर्दै सडकमा निस्किएका विप्लव कार्यकर्तालाई प्रहरीले तितरबितर पारेको जिल्ला प्रहरी कार्यालय उदयपुरका प्रवक्ता डीएसपी वेदप्रसाद गौतमले जानकारी दिए। बन्दको प्रभाव विराटनगर लगायतका विभिन्‍न स्थानमा सामान्य परेको प्रहरीले जनाएको छ। बन्दका कारण  शैक्षिक संस्था भने पूर्णरुपमा बन्द भए।