मोरङ र सुनसरीका बार पनि आन्दोलित

विराटनगर– प्रधानन्यायाधीश चोलेन्द्र शमशेर जबराको राजीनामा माग गर्दै मोरङ र सुनसरीका कानुन व्यवसायी पनि आन्दोलित भएका छन्। उच्च अदालत विराटनगर, मोरङ अदालत परिसरभित्र कानुन आइतबार व्यवसायीले धर्ना दिएका हुन्।

उच्च अदालत विराटनगर बार एसोसिएसन र मोरङ अदालत बार एसोसिएसनको आयोजनामा वरिष्ठ अधिवक्ता र अधिवक्ताहरूले धर्ना दिएका हुन्। विवाद र भ्रष्ट्राचारमा डुबेको भन्दै प्रधानन्यायाधीशविरुद्ध कालोपट्टी बाँधेर उनीहरूले प्रदर्शन गरेका थिए।

प्रधानन्यायाधीश जबराको राजीनामा माग गर्दै कानुन व्यवसायीले एक घण्टा शान्तिपूर्ण विरोध प्रदर्शन गरेका थिए। बारको कार्यालय अगाडि भेला भएर दिउँसो ११ देखि १२ बजेसम्म अदालत परिसरभित्र प्रदर्शन गरिएको उच्च अदालत बारका अध्यक्ष नारायणप्रसाद दाहालले बताए। 

सुनसरीमा बारको प्राङ्गणमा भेला भई बिहान ११ बजेदेखि १२ बजेसम्म हातमा कालो पट्टी बाँधेर तथा  कालो मास्क लगाएर न्याय क्षेत्र भित्रको भ्रष्टाचार, बेथिति, बिचौलिया समेतको न्यायिक शुद्धीकरणको माग गर्दै विरोध जनाएका हुन्। 

विरोध कार्यक्रमका वक्ता वरिष्ठ अधिवक्ता हेमराज पोखरेल, अधिवक्ताहरू लखनलाल यादव, अजय चौधरी, ईश्वरचन्द्र ढंगेल, आश्वीनी भट्टराई, अशोक मेहता लगायतले स्वतन्त्र न्यायालय बनाउनका लागि प्रधानन्यायाधीश जबराले तत्काल निकास दिनु पर्ने बताएका थिए।