कांग्रेस बैठकमा देउवाले गगनलाई भने- समसामयिक विषयमा बोल्न पाइँदैन

काठमाडौं- नेपाली कांग्रेसको केन्द्रीय कार्यसमितिको बैठकमा समसामयिक विषयमा बोल्न खोज्दा सभापति शेरबहादुर देउवाले केन्द्रीय सदस्य गगन थापालाई रोक्न खोजेका छन्।

आइतबार पार्टी सभापति निवास बूढानीलकण्ठमा भएको बैठकमा देउवाले रोक्न खोजे पनि उनको प्रयास असफल भएको हो।

गगनले समसामयिक विषयमा बोल्न समय माग्दा देउवाले केन्द्रीय समिति बैठकमा समसामयिक विषयमा बोल्न नपाइने भन्दै रोक्न खोजेका थिए।

'समसामयिक विषयमा बोल्न पाइँदैन,' देउवाले थापालाई भनेका थिए। समसामयिक विषयको कुरा उठाउँदै नेता थापाले न्यायालयको कुरा राख्न खोजेपछि देउवाले रोक्ने प्रयास गरेका थिए। 

यद्यपि गगनले आफ्ना कुरा राखेका थिए। 'सम्मानित अदालतमा भइरहेको समस्या चर्कियो भने व्यवस्थाले मूल्य चुकाउनुपर्छ। तत्काल सामाधान नगर्ने हो भने महाधिवेशनसम्म अवस्था बिथोलिन्छ। हामी चुप लाग्न मिल्दैन,' थापाले भनेका थिए, 'महाधिवेशनका विवाद कायम छन्। यसमा गम्भीर हुनुपर्छ। सभापतिको ध्यान जानुपर्छ।'