वीरगन्जमा छठको तयारी पूरा [१० तस्बिर]

पर्सा– वीरगन्जमा छठ पर्वको तयारी पूरा भएको छ। तराई मधेसमा विशेष रुपमा मनाइने छठ पर्वका लागि नदी, पोखरी, ताल र स्विमिङ पोखरी झकिझकाउ बनाइएको छ। वीरगन्जको घडिअर्वा, मुर्ली, रानीघाट, स्विमिङपुल, छपकैया, नगवा आदि जलाशय रंगीचंगी पारिएको छ। बजारमा किनमेल गर्नेको भीड लागेको छ भने परिवारबाट टाढा रहेका पनि घर फर्कन थालेका छन्।

सन्तान प्राप्ति, निरोगिता, सुख, समृद्धि र चर्मरोग निको हुने जनविश्वासअनुरुप पारस्परिक आत्मीयता र सद्भावको प्रतीकको रुपमा यो पर्व मनाइन्छ।

यस पर्वमा धनी, गरिब, उचनिचको भेदभावलाई छाडेर सबै वर्ग, समुदाय एउटै सांस्कृतिक पृष्ठभूमिमा पूजाअर्चनामा सहभागी हुन्छन्। चमार जातिले ढोल बजाउने, मालीले फूल, बरईले पानको पात, कुम्हारले माटोको भाँडा, डोमले बाँसका सामग्री तयार पार्ने यस वर्षका विशेषता हुन्। 

कार्तिक शुक्ल पञ्चमीका दिनमा आज छठका व्रतालु निर्जल उपवास बसी ‘खरना’ को विधि पूरा गर्दैछन्। निर्जल उपवास बसेका व्रतालुले बेलुकी घरमा खीर बनाई चन्द्रमालाई अर्पण गरी एक छाक खान्छन्। यसलाई खरना भनिन्छ।