कांग्रेस केन्द्रीय सदस्य नैनसिंह महरको शब्द रहेको ‘बन्छ बन्छ मेरो देश बन्छ’ गीत सार्वनिक

काठमाडौं । नेपाली कांग्रेसका केन्द्रीय सदस्य तथा लेखक नैनसिंह महरको शब्दमा तयार गीत ‘बन्छ बन्छ मेरो देश बन्छ’ सार्वजनिक गरिएको छ ।

प्रमोद खरेलको स्वर,  हरि लम्सालको संगीत रहेको  देशभक्ती गीतको भिडियोमा राजेश हमाल, महावीर पुन, प्रदिप कुमार राई (ब्याकुल माइला), समाजसेवी अनुराधा कोइराला, ओलम्पियन खेलाडी दिपक बिष्ट, नैनसिंह महर, मिस पबि, अस्तिना महर, अनिमेश महर, सविना तामाङलगायत फिचर्ड छन्।

दशरथ सुनारको निर्देशनमा तयार भिडियोमा देश कसरी बन्न सक्छ भन्ने सपना र आशा बाँडिएको छ। ललितपुरमा आयोजित कार्यक्रममा राष्ट्रिय गानका रचयिता प्रदिप कुमार राई (ब्याकुल माइला)ले गीतको सार्वजनिक गरेका हुन्। 

गीतकार महरले कांग्रेस एमालेको सरकार बनेकै बेलामा गीत सृजना गरिएको बताए। उनले भने, ‘जनतामा छाएको निराशालाई आशामा परिणत गर्ने गरी काम गर्ने गरी कांग्रेस एमालेको सरकार बनेको थियो। त्यो सरकारले के गर्‍यो भने जनतामा आशाको सञ्चार हुन्छ? भन्ने ट्रयाकमा लेखेको थिए।’ 

आधा दर्जन राजनीतिक र शैक्षिक पुस्तक लेखेका महरले पहिलो पटक गीत लेखेका हुन्। उनले भने, 'समाजमा निराशा बढिरहेको परिस्थितिमा गीतमार्फत सपना बाड्ने र आशा जगाउने कोशिस गरेको छु।’

गायक प्रमोद खरेलले राजनीति र साहित्य फरक विधा रहे पनि नैनसिंहले रोजेको बाटो सुखद रहेको बताए। सार्वजनिक गीतले समाजलाई आशाको सञ्चार गर्न सक्ने बताए।

वरिष्ठ पत्रकार पुरुषोत्तम दाहालले कला, साहित्य र संस्कृति देशकै पहिचान भएकाले त्यसविना देश नबच्ने बताए। उनले भने, ‘नैनसिंहको यो गीत मन र मष्तिष्क दुवैबाट निस्केको सृजना भएको महसुस गरेँ। देश राजनीतिले चलाउछ। तर, राजनीतिलाई पनि साहित्य र संस्कृतिले चलाउँछ।’ गीत, कविताले व्यवस्था परिवर्तनमै उल्लेख्य भूमिका निर्वाह गरेको पत्रकार दाहालले बताए। 

गीतकार समेत रहेका डा. भोला रिजालले राजनीतिमा प्रभाव जमाउँदै आएका नैनसिंहलाई लेखनमा देशभक्ती गीत ‘मेरो देश बन्छ’ले परिचय थप्ने बताए। ‘नैनको गीत हेरेर आफ्ना पूराना गीतको सम्झना आयो। देश बन्छ बन्छ भन्नेमा म पनि विश्वस्त छु,’ रिजालले भने। 

राष्ट्रिय गानका रचयिता प्रदिप कुमार राई (ब्याकुल माइला)ले लेखकहरूले समाज र राष्ट्रलाई सकारात्मक दिशामा लैजाने भावका सृजना सार्वजनिक गर्न सक्नुपर्ने बताए। 

उनले भने, ‘देश बन्छ, बनाउन सकिन्छ भन्ने भाव दिनुले देशमै बसेर पसिना बनाउने प्रेरणा प्रदान गर्दछ। देश स्रोतको अभावले होइन, सोचको अभावले नबनेको हो।’

कार्यक्रममा पूर्वमन्त्री भक्त बहादुर बलायर, ओलम्पियन खेलाडी दिपक विष्ट, देउडा गायक नन्दकृष्ण जोशी, कांग्रेस नेता रामहरि खतिवडा, उर्मिला थपलियालगायतका वक्ताहरूले गीत सफलताको शुभकामना दिएका थिए।