विराटनगर कारागारमा कैदीबन्दीबीच झडप

विराटनगर– विराटनगर कारागारमा कैदीबन्दीबीच झडप भएको छ। मंगलबार १० बजे कारागारभित्र कैदीबन्दीबीच झडप भएको हो। झडपमा चौकीदार किरण गुरुङसहित ६ जना घाइते भएका छन्। घाइते हुनेमा गुरुङ, शेखर राई, निर्मल ढकाल, विशाल मुक्तान, डिल्ली देवान र सूर्यदीप गुप्ता छन्।

घाइतेलाई सामान्य चोटपटक लागेकाले उपचारका लागि कोसी अस्पताल पठाएको कारागार प्रशासनले जनाएको छ। चौकीदार गुरुङको निर्देशनमा नाइके र भाइ नाइकेले यातना दिएको भन्दै  कैदीबन्दी आन्दोलित भएका हुन्। आन्दोलित कैदीबन्दीले गुरुङसहित १४ जना नाइके र भाइ नाइकेलाई एउटा कोठामा थुनिदिएका थिए। 

एउटा कोठामा थुनेर राखिएका कैदीबन्दीलाई प्रहरीले कारागारबाट बाहिर निकालेर राखेको छ। उनीहरुलाई बाहिर निकालिएपछि कारागारभित्रको तनाव अहिले केही मत्थर भएको छ। कैदीबन्दीको सुरक्षा र कारागारमा उत्पन्न तनाव अन्त्यका लागि १४ जनालाई नै अरू कारागारमा स्थानान्तरणको तयारी भइरहेको निमित्त जेलर रामप्रसाद पोखरेलले बताए।
कारागारभित्र मुढा बनाउने बाँसका भाटा लगायतको प्रयोग भएको पाइएको छ। घाइतेको कोसी अस्पताल विराटनगरमा उपचार भईरहेको  पोखरेलले बताए।