प्रदेश १ सरकारको मन्त्रिपरिषद् बैठक : पूर्वसरकारका सबै निर्णय खारेज गरिने

काठमाडौं–  नेकपा एकीकृत समाजवादीका नेता राजेन्द्र राईको नेतृत्वमा प्रदेश १ मा नयाँ सरकार गठन भएको छ। नयाँ सरकार गठन भएसँगै बसेको मन्त्रिपरिषद् बैठकले पूर्वमुख्यमन्त्री भीम आचार्यको सरकारले गरेका निर्णय खारेज गर्ने निर्णय गरेको छ।

मंगलबार राति सम्पन्न बैठकले मन्त्रिपरिषद्ले पूर्वसरकारका निर्णय खारेजी प्रक्रियामा लैजानेलगायत विभिन्न तीन निर्णय गरेको हो।

बैठकले आचार्य नेतृत्वको सरकार गठन भएपछि भएका विभिन्न नियुक्ति, सरुवा तथा निर्णयलाई खारेजीको प्रक्रियामा लैजाने निर्णय गरेको हो।

बैठकले आचार्य नेतृत्वको सरकार गठन असंवैधानिक भएको ठहर गर्दै उक्त समयमा भएका सबै निर्णय खारेज गर्ने निर्णय गरेको हो।

आचार्य नेतृत्वको सरकारले प्रदेश पर्यटन बोर्ड, प्रदेश श्रम सल्लाहकार, प्रदेश खेलकुद बोर्ड गठन गर्नुका साथै विभिन्न मन्त्रालयमा भएका कर्मचारीहरूको सरुवा, अस्थायी कर्मचारीको म्याद थपलगायतका निर्णय गरेको सामाजिक विकासमन्त्री जयराम यादवले जानकारी दिए।

बैठकले प्रदेशका १३७ स्थानीय तहबाट सिमान्तकृत, दलित र विपन्न तथा अल्पसंख्यकलाई प्राविधिक शिक्षा अध्ययनका लागि छात्रवृत्ति प्रदान गर्ने निर्णय गरेको उनले बताए। यस्तै लोपोन्मुख संस्कृति संरक्षणको लागि कार्यविधि तर्जुमा गर्ने निर्णयसमेत बैठकले गरेको छ।