समाजवादीका राई आज मुख्यमन्त्री बन्दै

विराटनगर- नेकपा एकीकृत समाजवादी संसदीय दलका नेता राजेन्द्र राई मंगलबार प्रदेश १ को तेश्रो मुख्यमन्त्री बन्दै छन्। 

प्रदेश सरकारमा अल्पमतमा परेपछि एमालेका भीमप्रसाद आचार्यले सोमबार मुख्यमन्त्री पदबाट राजीनामा दिएका थिए।  उनले राजीनामा दिएपछि प्रदेश प्रमुख सोमनाथ अधिकारी प्यासीले मंगलबार दिउँसो १ बजे सम्ममा नयाँ सरकार गठनका लागि दावी पेश गर्न समय दिएका थिए।

प्रदेश प्रमुख अधिकारीबाट नयाँ सरकारका लागि आह्वान भएलगत्तै विपक्षी गठबन्धनले ४९ सांसदको हस्ताक्षर सहित समाजवादीका राईलाई मुख्यमन्त्रीमा प्रस्ताव गर्दै दावी पेश गरेको थियो। 

प्रदेश प्रमुख अधिकारीले मंगलबार २ वजे मुख्यमन्त्रीको सपथ ग्रहणको समय तय गरेको प्रदेश प्रमुखको सचिवालयले जनाएको छ। मुख्यमन्त्रीमा नियुक्त भए लगत्तै राईले मंगलबार नै सानो आकारको मन्त्रिपरिषद् गठनको तयारी गरेका छन्। 

हालका ६ मन्त्रालयलाई विभाजन गरेर मन्त्रालयको संख्या बढाईने भएको छ। मन्त्रालयको संख्या बढाउनुको विकल्प नभएको गठबन्धन दलका नेताहरुले बताएका छन्। गठबन्धन दलहरुको बैठक विहान ९ वजे बस्दै छ। बैठकले सरकारमा सहभागी मन्त्रीहरुको नाम र मन्त्रालय तय गर्ने बताईएको छ।