प्रदेश-१ : राजेन्द्र राईलाई मुख्यमन्त्री बनाउन ४९ सांसदको हस्ताक्षरसहित दाबी पेस

विराटनगर- प्रदेश १ को मुख्यमन्त्रीमा राजेन्द्र राईलाई प्रस्ताव गर्दै ४९ जना सांसदहरुको हस्ताक्षर प्रदेश प्रमुख सोमनाथ अधिकारी प्यासीलाई बुझाइएको छ। 

प्रदेश प्रमुख अधिकारीले नयाँ सरकार गठन गर्न आह्वान गरेलगत्तै विपक्षी गठबन्धनले नेकपा एकीकृत समाजवादी संसदीय दलका नेता राईलाई मुख्यमन्त्रीमा प्रस्ताव गर्दै नयाँ सरकार गठन गर्नका लागि दाबी पेस गरेको हो।

राईलाइ मुख्यमन्त्री बनाउने प्रस्तावमा नेपाली कांग्रेसका २१, नेकपा माओवादी केन्द्रका १४, नेकपा एकीकृत समाजवादीका १०, जनता समाजवादी पार्टीका ३ र संयुक्त लोकतान्त्रिक राष्ट्रिय मञ्चका एक जना गरी ४९ सांसदले हस्ताक्षर गरेका छन्।नेकपा माओवादी केन्द्रबाट निर्वाचित उपसभामुख सरस्वती पोखरेल मातृशोकमा काठमाडौंमा रहेका कारण उनको हस्ताक्षर छैन।

मुख्यमन्त्री भीम आचार्यले राजीनामा दिएलगत्तै प्रदेश प्रमुखले मंगलबार १ बजेसम्म नयाँ सरकारको दावी पेस गर्न आह्वान गरेका थिए। राईले मुख्यमन्त्रीको सपथ मंगलबार लिएर सानो आकारको मन्त्रिपरिषद् पनि तत्काल गठन गर्ने तयारी गरेका छन्।