प्रदेश–१ का मुख्यमन्त्री आचार्यले राजीनामा दिए

काठमाडौं– प्रदेश १ का मुख्यमन्त्री भीमप्रसाद आचार्यले जारी प्रदेशसभा बैठकबाट राजीनामा दिएका छन्।

प्रदेशसभा बैठकलाई सम्बोधन गरेर उनले राजीनामा दिएका हुन्। सम्बोधनका क्रममा आचार्यले सरकारले गरेका कामबारे बताएका थिए।

९२ सदस्यीय प्रदेशसभामा मुख्यमन्त्री आचार्यलाई विश्वासको मत प्राप्त गर्न कम्तीमा ४६ सांसद आवश्यक पर्ने थियो। तर मुख्यमन्त्रीको दल एमालेसँग सभामुखसहित ४१ सांसदमात्रै छन्। पाँच दलिय विपक्षी गठबन्धनसँग ५० सांसद छन्।  

कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्चका १ जान प्रदेश सांसद छन्। कसैको पक्षमा नखुलेको राप्रपासँग १ मत छ।

यसैबिच, मुख्यमन्त्री आचार्य पदमुक्त हुने भएपनि नयाँ सरकार कसको नेतृत्वमा बनाउने भन्नेमा अझै अन्योल छ। प्रदेश १ को मुख्यमन्त्रीमा नेकपा एकीकृत समाजवादी पार्टी र नेपाली कांग्रेसले दाबी गरेका छन्। 

केन्द्रमा भएको सहमति अनुसार नेतृत्व एकीकृत समाजवादी पार्टी पाउने भनिए पनि आफ्नो बर्चस्व रहेको प्रदेश १ मा अरुलाई नेतृत्व सुम्पिन नसकिने कांग्रेसले अडान लिएको छ।