नेतृत्व सर्वसम्मत नभएपछि एमाले विराटनगरको अधिवेशन स्थगित

विराटनगर– नेकपा (एमाले) विराटनगर महानगर कमिटीको अधिवेशन स्थगित भएको छ। महानगरको नेतृत्वमा सर्वसम्मत हुन नसकेपछि बुधबार बिहानसम्मका लागि अधिवेशन स्थगित भएको नेताहरुले बताएका छन्।

महानगरको अध्यक्षमा वर्तमान अध्यक्ष सागर थापा र पर्शुराम बस्नेत, उपाध्यक्षमा शिल्पा कार्की, सचिवमा राधेश्याम कट्टेल, मीनकुमार आचार्य र रोहित कोइराला आकांक्षी देखिएका छन्। पार्टी नेताहरुले सर्वसम्मतका लागि प्रयास गरे पनि सहमति नजुटेपछि बुधबार बिहान १० बजे बन्द शत्र शुरु हुनेगरी अधिवेशन स्थगित गरिएको एक नेताले बताए।

वर्तमान अध्यक्ष थापा यसअघि २ पटक महानगरको नेतृत्व गरिसकेकाले अध्यक्षमा दावी छाड्नु पर्ने अर्का आकांक्षी बस्नेतको भनाइ छ। अध्यक्षका आकांक्षी थापा भने यसअघि पाटीले स्वतः जिम्मेवारी दिएकाले एक पटक अधिवेशनबाट महानगरको नेतृत्व गर्न आफूले चाहेको बताएका छन् । 

उपाध्यक्षमा हालसम्म एक जनाको मात्रै दावी रहँदै आएको छ। सचिवमा तीन जना आकांक्षी देखिएपछि सर्वसम्मत गराउन समस्या भएको बताइएको छ। एक नेताले भने,‘ सर्वसम्मतको प्रयास भइरहेको छ, सकभर निर्वाचन हुँदैन।’ तर, सचिवका तीनै जनाले आफ्नो दावी कायम रहेकाले निर्वाचनबाट टुङ्ग्याउनुपर्ने बताउँदै आएका छन्। सहसचिव लगायतका अन्य पदहरुमा समस्या नरहेको बताइएको छ। 

महानगरको अधिवेशनमा ८७३ जना प्रतिनिधि सहभागि भएका छन्। एमाले मोरङले विराटनगर महानगरपालिकाको अधिवेशन सम्पन्न गर्नका लागि आवश्यक सहजीकरणका लागि केन्द्रीय सदस्य तथा प्रदेश कमिटी सचिव विनोद ढकाल सहित नेताहरु खेम नेपाली, राजेश सुब्बा, रमेश पोखरेल, रामलाल साह, रामचन्द्र महतो र विमला घिमिरेलाई जिम्मेवारी दिएको छ।