मोरङ : नेकपा (एस) बलियो रहेका पालिकामा रोकियो एमाले अधिवेशन

विराटनगर- पार्टी विभाजनपछि एमाले कमजोर बनेका पालिकामा अधिवेशन रोकिएको छ। एमालेले बाढीपहिरो प्रभावितबाहेकका सबै पालिकामा मंगलबार अधिवेशन हुने बताए  पनि मोरङका पाँच वटा पालिकामा तत्कालका लागि अधिवेशन रोकिएको हो।

उर्लाबारी, लेटाङ, सुनवर्षी नगरपालिका तथा धनपालथान र जहदा गाउँपालिकामा मंगलबार अधिवेशन हुने छैन। लेटाङ र उर्लाबारीमा नेकपा एकीकृत समाजवादीको पकड छ। अन्य पालिकामासमेत एकीकृत समाजवादीसामु एमाले कमजोर छ।

एमाले कमजोर रहेका पालिकामा पार्टी प्रवेश गराएर मात्र अधिवेशन गर्ने तयारीमा एमाले मोरङको छ। एमाले मोरङका अध्यक्ष ऋसिकेश पोख्रेलले  तयारी नसकिएकोले अधिवेशन केही समय पछाडि सारिएको दाबी गरे।

उर्लाबारी र लेटाङमा  १२ कात्तिकका लागि अधिवेशन तय भएको छ। अन्य पालिकामा मिति तय भइसकेको छैन। मोरङमा मंगलबार १२ पालिकामा मात्रै एमालेको अधिवेशन हुँदैछ। अधिवेशनमा हुने पालिकामा विराटनगर, र‌ंगेली,रतुवामाई, कानेपोखरी, पथरी शनिश्चरे, मिक्लाजुङ, बेलबारी, सुन्दरहरैचा, केराबारी, ग्रामथान र बुढीगंगा छन्।