फिदिममा भएको बस दुर्घटनाका १६ घाइतेलाई उद्धार गरी धरान ल्याइयो

विराटनगर- पाँचथरको फिदिममा सोमबार बिहान भएको सवारी दुर्घटनामा परी घाइते भएका एक दर्जन बढीलाई साँझ नेपाली सेनाको हेलिकोप्टरमार्फत उद्धार गरिएको छ। उनीहरुलाई उद्धार गरी सुनसरी धरानको बीपी कोइराला स्वास्थ्य विज्ञान प्रतिष्ठान ल्याइएको छ। 

एम्बुलेन्स नपाएका तथा गम्भीर घाइतेहरुलाई नेपाली सेनाको हेलिकोप्टरले साँझ उद्धार गरेको पाँचथरका प्रमुख जिल्ला अधिकारी पुण्यप्रसाद ढकालले बताए। नेपाली सेनाको एम–१७ हेलिकोप्टरले १६ विरामी र तिनका तीन जना कुरुवा समेतलाई फिदिमबाट धरान पुर्‍याएको हो। 

घाइतेहरुको स्वास्थ्य अवस्था जटिल हुँदै गएपछि नेपाली सेनाको हेलिकोप्टरले उद्धार गरेको हो। दुर्घटनामा घाइते भएका २८ जनालाई एम्बुलेन्समार्फत थप उपचारका लागि झापाका विभिन्‍न अस्पतालमा पुर्‍याइएको प्रजिअ ढकालले बताए। फिदिममा विभिन्‍न स्वास्थ्य संस्थामा १७ जनाको उपचार भइरहेको प्रहरीले जनाएको छ। उनीहरुको अवस्था सामान्य रहेको बताईएको छ। 

दुर्घटनामा चार जनाको मृत्यु भएको छ। मोरङ लेटाङ नगरपालिका–६ का सात वर्षीय प्रज्वल मगर, इलामकी ३४ वर्षीया प्रमिला देवान र उनकै सात महिने छोरा निश्चल देवानको मृत्यु भएको हो। एक जना मृतक महिलाको पहिचान खुल्न सकेको छैन। 

फिदिम नगरपालिका–४ शिवादोभानबाट झापाका लागि हिँडेको को १ ख ३८६५ नम्बरको बस फिदिम नगरपालिका–४ सरखण्डे सडकबाट करीब २० मिटर तल झरेको थियो।