बाढीका कारण विराटनगरमा ३ जनाको मृत्यु

विराटनगर- सोमबार र मंगलबारको वर्षाका कारण विराटनगरमा ३ जनाको मृत्यु भएको छ। ३ हजार घरपरिवार प्रभावित भएका छन्। 

शुक्रबार महानगरस्तरीय विपद् व्यवस्थापन समितिको बैठकमा महानगर प्रमुख भीम पराजुलीले बाढीका कारण ३ जनाको मृत्यु भएको बताए। उनले मृतकका परिवारलाई तत्काल किरिया खर्च ५० हजार उपलब्ध गराइने निर्णय भएको बताए। प्रमुख पराजुलीले भने, ‘प्रदेश र संघीय सरकारले मृतकका परिवारले राहत दिने निर्णय गरेको कहिले आईपुग्ला, त्यही भएर महानगरले किरिया खर्च दिन लागेको हो।’ 

उनले बाढी र डुवानका कारण प्रभावित भएकाहरुलाई संघीय सरकारले १५ हजार तत्काल क्षतिपुर्ती उपलब्ध गराउने भएकाले वडा कार्यालयहरुमा जानकारी गराउन आग्रह गरे। बाढी र डुबानबाट भएको क्षतिको विवरण महानगरले संकलन गरिरहेको उनले बताए। 

प्रमुख पराजुलीका अनुसार बाढी र डुवानका कारण विस्थापीत भएकाहरुलाई महानगरले खाना खुवाईरहेको छ। बाढीका कारण प्रभावित भएका कृषक र व्यवसायीलाई तत्काल राहत उपलब्ध गराउन प्रदेश र संघीय सरकार समक्ष माग गरिने प्रमुख पराजुलीले बताए। 

वर्षाका कारण विराटनगरका अधिकांश वडाहरु डुवानमा परेको विराटनगर महानगरपालिकाका विपद् फोकल पर्शन राजेन्द्र प्रधानले बताए। उनका अनुसार हालसम्म २ हजार ६९० घर परिवार बाढी र डुवानबाट प्रभावित छन्। प्रधानले भने,‘ यो प्रारम्भिक तथ्याङ्क मात्रै हो, विवरण संकलन भईरहेको छ।’ प्रधानका अनुसार विराटनगर १ बाढीका कारण बढी प्रभावित बन्यो। वडा नम्वर १ मा ६ सय घर परिवार डुवानमा परेको उनले बताए।