गोलै नखाई नकआउट चरण पुगेको उरुग्वे रोनाल्डोका लागि कति घातक !

काठमाडौं- जारी विश्वकप प्रतियोगिता अन्तर्गत शनिबार राति हुने खेललाई विशेष महत्वका साथ हेरिएको छ । प्रतियोगितामा पोर्चुगलले उरुग्वेको सामना गर्नुपर्नेछ ।

गोल्डेन बुटको दाबेदार मानिएका पोर्चुगलका कप्तान क्रिस्टियानो रोनाल्डोका लागि पनि यो खेल निक्कै चुनौतीपूर्ण हुनेछ । किनकी उरुग्वे जारी प्रतियोगितामा एक गोल पनि नखाई यो चरणसम्म आउने पहिलो राष्ट्र हो । 

उरुग्वेको गोलरहित समुह चरणको यात्रा यो भने पहिलो हैन । यस भन्दा पहिला चार पटक पनि उरुग्वे गोल नखाई नै समूहचरण पार गर्न सफल भएको थियो । 

२०१०, १९५४, १९५० र १९३० मा उरुग्वले कुनै गोल नखाई समूह चरण पार गरेको थियो । १९५४ मा समूह चरणको खेलमा उरुग्वेले स्कटल्याण्डविरुद्ध एकै खेलमा ७ गोल गरेको थियो । त्यस्तै १९५० मा बोलिभिया विरुद्ध ८ र १९३० मा रोमानीविरुद्ध चार गोल गरेको थियो ।

उरुग्वेले समूह चरणका तीन खेल खेल्दै पाँच गोल गर्‍यो । पहिलो खेलमा इजिप्टलाई १-० ले पराजित गर्दा दोस्रो खेलमा पनि साउदी अरबियालाई १-० ले पराजित गरेको थियो । समूहको अन्तिम खेलमा आयोजक रुसलाई ३-० को फराकिलो जितले समूह बिजेता बन्दै उरुग्वे नकआउट चरणमा पुगेको हो ।