जसपाले ४३ महिनाको भाडा नतिरेपछि घरबेटीले प्रशासन गुहारे

पर्सा- जनता समाजवादी पार्टी (जसपा) ले ४३ महिनादेखि कार्यालयकोभाडा नतिर्दा घरबेटीले प्रशासनलाई गुहारेका छन्। विगत तीन वर्षदेखि विभिन्‍न नेता कार्याकर्ताहरु कहाँ धाउने गरे पनि भाडा नउठेपछि बाध्य भएर ४३ महिनाको घर भाडा तिराइदिन र घर खाली गराइदिन माग गर्दै जिल्ला प्रशासन कार्यालय पर्सामा निवेदन दिएको घरबेटी बैजनाथ साहले बताएका छन्। 

वीरगंजको मूर्लिस्थित सुरेश आयलको छेउमा मेनरोडसँगै रहेको जसपा पर्साको पार्टी कार्यालयले विगत ४३ महिनादेखि कार्यालयको भाडा नतिरेकोले खाली गर्न घरबेटीले बुधबार जिल्ला प्रशासन कार्यालय पर्सामा निवेदन दिएका हुन्। 

पर्सामा चारवटै संसदीय निर्वाचन क्षेत्रमा जसपा नेतृत्वको गठबन्धन विजयी भएका छन्। बाराको प्रसौनी गाउँपालिका वडा नं. ३ निवासी बैजनाथ प्रसाद साहको वीरगंज मूर्लिस्थित रहेको घरको माथिल्लो तल्लाको दुईवटा कोठासहितको फ्ल्याट जसपा पर्साले भाडामा लिई पार्टी कार्यालय राखेको छ। प्रति महिना रु ८ हजारको दरले विगत ४३ महिनादेखिको कोठा भाडा तीन लाख ४४ हजार रुपैयाँ तिरेका छैनन्। पटक-पटक भाडा मागे पनि भाडा नपाउँदा बाध्य भएर भाडा तिराएर कोठा खाली गराइदिन निवेदन दिएको घर साहु बैजनाथ प्रसाद साहले बताए। घरधनी साहले भने, 'जसपा पर्साका अध्यक्ष रामनरेश यादव र सचिव तबरेज अहमद भएदेखि पटक-पटक भाडा दिन आग्रह गरे पनि विगत ४३ महिनादेखि भाडा दिएका छैनन्।' पटक-पटक भाडा माग गरे पनि दुबैजनाले बेवास्ता गर्दै आएको उनको आरोप छ। 

यता जसपा पर्साका अध्यक्ष रामनरेश यादवले कोठाभाडा बाँकी रहेको स्वीकार्दै कात्तिक १४ गते नयाँ ठाउँमा पार्टी कार्यालय सार्न लागेकाले जे-जति भाडा बाँकी छ सबै तिर्ने साहुलाई जानकारी गराइसकेको दाबी गरे पनि यस विषयमा घर साहु बैजनाथ साहले भने आफूलाई त्यस्तो केही जानकारी नगराएको बताए।