बाढीपहिरो अपडेट: ५० जनाको मृत्यु, ३१ बेपत्ता, कहाँ के भयो?

काठमाडौं- अविरल वर्षासँगै आएको बाढीपहिरोमा परेर देशभर ५० जनाको मृत्यु भएको छ भने ३१ जना बेपत्ता भएका छन्। प्रदेश १ मा मात्रै २७ जनाको मृत्यु भएको छ भने सुदूरपश्चिम प्रदेशमा १५ जनाको बाढीपहिरोमा परेर ज्यान गएको छ। कर्णाली प्रदेशमा ७ र बागमती प्रदेशमा एक जनाको मृत्यु भएको छ। 

जिल्लागत हिसाबमा प्रदेश १ को इलाममा १२, पाँचथरमा ७, धनकुटामा ६ र सुनसरीमा २ जनाको पहिरोमा पुरिएर मृत्यु भएको प्रदेश प्रहरी कार्यालयले जनाएको छ। यस्तै सुदूरपश्चिम प्रदेशको डोटीमा ९, बैतडीमा ४ जना र डडेलधुरामा २ जनाको मृत्यु भएको छ। त्यस्तै कर्णाली प्रदेशको हुम्लामा ६ र कालिकोटमा १ जनाको पहिरोमा पुरिएर मृत्यु भएका छ। बागमती प्रदेशको सिन्धुलीमा पनि एक जनाको मृत्यु भएको छ। 

बाढीपहिरोमा परेर बझाङमा २३, कैलालीमा ४, इलाममा ३ र डोटीमा एकजना बेपत्ता भएका छन्। बझाङको थलारा गाउँपालिका–४ को डिख्लामा मंगलबार बिहान परेको पहिरोले घर बगाउँदा चार परिवारका २३ जना बेपत्ता छन् भने कैलालीमा नदीमा बगेर चार र डोटीमा एक जना बेपत्ता भएको सुदूरपश्चिम प्रदेश प्रहरी कार्यालयले जनाएको छ। यस्तै इलाममको माङसेबुङ गाउँपािलकामा २ र फाकफोकथुम गाउँपालिकामा एक जना बेपत्ता भएका छन्। 

इलाममा पहिरोमा पुरिएर १२ जनाको मृत्यु, ३ बेपत्ता

अविरल वर्षासँगै गएको पहिरोमा परी इलाममा १२ जनाको मृत्यु भएको छ। पहिरोले पुरिँदा फाकफोकथुम गाउँपालिकामा एकै परिवारका ४ सहित ५ जनाको भएको छ। त्यस्तै सूर्योदय नगरपालिकामा ३, माई नगरपालिकामा १ र माङसेवुङ गाउँपालिकामा २ जनाको ज्यान गएको जिल्ला प्रहरी कार्यालय इलामले जनाएको छ। इलाममा अझै ३ जना बेपत्ता रहेका छन्।

टीका लगाउन आएका पाहुनासहित ६ जनाको मृत्यु

धनकुटाको चौबिसे गाउँपालिका–१ गडेरेमा पहिरोले घर भत्काउँदा टिका लगाउन आएका तीन जना पाहुँनासहित ६ जनाको मृत्यु भएको छ। मंगलबार राति खसेको पहिरोमा ६ जना घाइते छन्। प्रहरीका अनुसार मृत्यु हुनेमा एकैघरका ६० वर्षीय भीमबहादुर श्रेष्ठ, ९ वर्षीय विनोद श्रेष्ठ, ५ वर्षीया निर्जला श्रेष्ठ छन्। यस्तै झापाको दमक नगरपालिका–११ घर भएका ३९ वर्षीय सञ्जीव श्रेष्ठ, ३८ वर्षीया लक्ष्मी श्रेष्ठ र ७ वर्षीया दिप्सन श्रेष्ठको पनि पहिरोमा पुरिएर मृत्यु भएको छ। स्थानीयका अनुसार उनीहरु टिका लगाउन पाहुँना आएका थिए। पहिरोमा परि घाइते ६ जनामध्ये तीन जनाको अवस्था चिन्ताजनक छ। 

पाँचथरमा ७ जनाको मृत्यु

अविरल वर्षासँगै गएको पहिरोमा पुरिए पाँचथरका विभिन्न स्थानमा ५ जनाको मृत्यु भएको छ। जिल्ला प्रहरी कार्यालय पाँचथरका अनुसार सदरमुकाम फिदिम, मिक्लाजुङ, फाल्गुनन्द र कुम्मायक गाउँपालिकामा गएको पहिरोमा परी ७ जनाको मृत्यु भएको हो। 

डोटीमा एकै परिवारका चारसहित ९ जनाको मृत्यु

सुदूरपश्चिमको डोटीमा पहिरोमा पुरिएर एकै परिवारका चार जनासहित ९ जनाको ज्यान गएको छ। जिल्ला प्रहरी कार्यालय डोटीका अनुसार पहिरोमा च्यापिएर जोरायल गाउँपालिका वडा नम्बर ४ का एकै परिवारका ४२ वर्षीय शेरबहादुर विक, १८ वर्षीय मोहन विक, १३ वर्षीय पवित्रा विक र १६ वर्षीय रविन विकको मृत्यु भएको हो। जोरायल गाउँपालिका वडा नम्बर ३ का ६३ वर्षीय जोगी सार्कीको मृत्यु भएको छ।

डोटीकै सायल गाउँपालिका–६ खातिवाडामा घरमा सुतिरहेको अवस्थामा घर माथिबाट आएको पहिरोमा परेर दिलबहादुर कुन्जेडाका १४ वर्षीय  छोरा सागर कुन्जेडा र ११ वर्षीय छोरा आशिस कुन्जेडाको मृत्यु भएको छ। डोटीकै शिखर नगरपालिका वडा नम्बर ११ कि ३५ वर्षीय मन्धरा बलायरको पहिरोको ढुङ्गा लागेर मृत्यु भएको छ। यस्तै सुदूरपश्चिमको बैतडीमा ४ र डडेल्धुरामा २ जनाको पनि पहिरोमा पुरिएर ज्यान गएको छ। 

पहिरोले घर पुरिँदा बेपत्ता भएका ६ जनाको शव भेटियो

हुम्ला पहिरोले घर पुरिँदा वेपत्ता भएका ६ जनाकै मृत्यु भएको छ। मृत्यु हुनेहरुमा खार्पुनाथ गाउँपालिका ५ खर्पेल गाउँका घरमुली धनविरे शाही, कलबहादुर शाही, धोक्ची शाही, हुमेश शाही, अलिन्द शाही र दुई वर्षिय नाबालक छन्। 

पहिरोले घर पुरिंदा बेपत्ता भएका ६ जनाकै शव आज (बुधबार) बिहान भेटिएको हुम्लाका डीएसपी हेरम्भ शर्माले जानकारी दिए। अविरल बर्षापछि आएको बाढीले हिजो राती करिव ८ बजेतिर पहिरोले घरसँगै परिवारका सबै सदस्यलाई पुरेको थियो।