बाढीका कारण धरान–धनकुटा सडकखण्ड अवरुद्ध

विराटनगर- अविरल वर्षासँगै आएको बाढीले सडक बगाउँदा कोशी राजमार्ग अन्तर्गतको धरान–धनकुटा सडक खण्ड अवरुद्ध भएको छ।

लेउती खोलामा आएको बाढीले साँगुरीगढी गाउँपालिका ६ फेदीमा करिब ५० मिटर सडक बगाएको सडक डिभिजन कार्यालयका सुपरभाइजर अमृता राईले जानकारी दिइन्। पानीको बहाव बढेको कारण सडक अझैँ क्षति हुने सम्भावना रहेको उनले बताइन्। उनका अनुसार तत्काल कुनै वैकल्पिक बाटो बनाउने स्थिति छैन। 

बाढीले सडक बगाएपछि सयौँ गाडीहरु बाटोमा नै रोकिएका छन्। यात्रुहरु बीचबाटोमै अलपत्र परेका छन्। सडक बगाएको क्षेत्रमा कुनै बस्ती छैन। 

अविरल वर्षाका कारण राजमार्गका वरिपरि पहिरोको सम्भावना बढेको छ। निरन्तरको वर्षाका कारण हिले–भोजपुर सडकखण्ड पनि अवरुद्ध भएको छ। हिले भोजपुर सडक खण्ड अन्तर्गत पाख्रिबास नगरपालिका वडा नम्बर ६ डिकुरेमा सडक अवरुद्ध भएको छ। अविरल वर्षाका कारण सडक खुलाउन नसकिएको धनकुटाका प्रहरी प्रमुख एसपी नहकुल पोख्रेलले बताए।