सिटिजन्स बैंक लुटपाटमा संलग्‍न थप एक पक्राउ

विराटनगर- मोरङ धनपालथान–४ कर्सिया बजारमा शाखा रहेको सिटिजन्स बैंक लुटपाटमा संलग्न थप एक जनालाई प्रहरीले नियन्त्रणमा लिएको छ। भारत अररिया फारवेसगञ्‍ज १० का २० वर्षीय रोशन यादवलाई सुनवर्षी नगरपालिका ८ बाट सोमबार नियन्त्रणमा लिएर प्रहरीले मंगलबार सार्वजनिक गरेको हो।

प्रहरीले यसअघि पक्राउ परेका अभियूक्त श्याम मुखियाको डेरा कोठामा खानतलासी गर्दा  एक थान ९ एमएमको पेस्तोल, सो पेस्तोलको एक थान म्याग्जिन र आधा केजी गाँजा बरामद गरिएको प्रहरी प्रवक्ता डिएसपी दिपक श्रेष्ठले बताए। 

गत असोज २५ गते पौने ४ बजेतिर कर्सिया बजारको बीपी चोकमा रहेको सिटिजन्स बैंकमा नगद लुटपाटमा संलग्न ३ जनालाई सोही प्रहरीले पक्राउ गरेको थियो। विराटनगर महानगरपालिका ८ का ३२ बर्षीय श्याम मुखिया, भारत अररिया सेखपुरा ५ का २८ बर्षीय सुनिल यादव र भारत अररिया गोराहा ४ का ३० बर्षीय विजय सहनीलाई बैंक लुटेर भाग्दै गर्दा धनपालथान २ बाट प्रहरीले नियन्त्रणमा लिएको थियो। 

बैंक लुटपाटमा संलग्‍न ४ जनाको समूहले असोज २२ गते विराटनगरको एक गार्मेन्टमा पनि लुटपाट गरेको खुलेको छ। कोटेक्स ट्रेडिङ सप्लायर्सका संचालकलाई हातहतियार देखाई नगद १२ हजार लुटेको अनुसन्धानका क्रममा खुलेको डिएसपी श्रेष्ठले बताए।