बैतडीको ढुंगाड बस्ती जोखिममा, करिब दुई सय परिवार विस्थापित

काठमाडौं– बैतडीको सिगास गाउँपालिका–५ स्थित ढुंगाड बस्ती जोखिममा परेको छ। बस्तीको दुई तर्फबाट सेती नदीले घेरेपछि करिब २ सय परिवार विस्थापित गरिएको सिगास गाउँपलिकाका अध्यक्ष हरि सिंह धामीले जानकारी दिए। 

उनका अनुसार अहिले करिब ६० जना उद्धारको पर्खाइमा रहेका छन्। ‘करिब २ सय परिवार रहेको गाउँ नै जोखिममा परेपछि परिवार माथि विद्यालयमा सारिएको छ,’ गाउँपालिकाका अध्यक्ष धामीले भने, ‘५० देखि ६० जना त्यहीँ रहेका छन्। उद्धारका लागि नेपाली सेनाको हेलिकप्टर मगाएका थियौं। मौसमका कारणले हेलिकप्टरबाट पनि उद्धार हुन सकेको छैन।’ 

उनका अनुसार करिब २ सय परिवारलाई सोमबार राति नै विद्यालयमा स्थानान्तरण गरिएको हो। बाँकी ५० देखि ६० जनालाई उद्धारका लागि नेपाल प्रहरी, नेपाली सेनालाई खबर गरी उद्धारको पहल गरिए पनि तत्काल उद्धार सम्भव नभइरहेको धामीको भनाइ थियो।

गत आइतबारदेखि नै परेको वर्षाका कारण बैतडीका अधिकांश स्थानमा टेलिकम र एनसेलका नेटवर्कले काम गरेका छैनन्। ढुंगाड बस्तीमा पनि मोबाइल फोनले काम नगरेपछि बस्तीसँगको सम्पर्क विच्छेद भएको गाउँपालिकाका अध्यक्ष धामीको भनाइ छ। जिल्लाका अधिकांश स्थानमा मोबाइल फोनका नेटवर्क समेत सौर्य उर्जाबाट सञ्चालित भएका कारण सामान्य पानी पर्ने बित्तिकै सम्पर्क विच्छेद हुने समस्या रहेको छ।