महाकालीको बाढी प्रभावित क्षेत्र पुगे एनपी साउँद, उद्धार र राहतको व्यवस्था गर्न आग्रह

कञ्‍चनपुर– नेपाली कांग्रेसका केन्द्रीय सदस्य एनपी साउँद महाकालीको बाढी प्रभावित क्षेत्रमा पुगेका छन्। आइतबारदेखिको लगातार वर्षाका कारण महाकाली नदीमा बाढी आएपछि उनी प्रभावित क्षेत्रमा पुगेका हुन्।

महाकाली नदीमा पछिल्लो सात दशकयताकै सबैभन्दा बढी पानीको वहाब आएको छ। सोमबार पानीको वहाब पाँच लाख ३१ हजार क्युसेक रहेको जनाइएको छ। 

बाढीका कारण महाकालीको भुजेला क्षेत्र सबैभन्दा बढी प्रभावित भएको छ। उक्त क्षेत्रमा पुगेर पूर्वमन्त्रीसमेत रहेका नेता साउँदले स्थानीयलाई सुरक्षित ठाउँमा जान आग्रह गरेका छन्। 

त्यसैगरी स्थानीय, प्रदेश र केन्द्र सरकारसँगै प्रशासन र सरोकारवालाहरुलाई तत्काल उद्धार र राहतमा खटिन समेत आग्रह गरेका छन्। उनले नेपाल समयसँग कुरा गर्दै भने, ‘बेमौसमी वर्षाका कारण आएको बाढीले किसानहरुको धानबाली नस्ट गरेको छ। एकातर्फ जीवन कसरी जोगाउने भन्‍ने चिन्ता बढेको छ भने अर्कोतर्फ जीवन जोगाउन सफल भएमा वर्षभरी के खाने भन्‍ने चिन्ता बढेको छ। तत्काल सरकारले यसको लगत संकलन गर्दै क्षतिपूर्ति दिनुपर्छ।’ 

उनले यसका लागि आफूले पहल गर्नेसमेत बताएका छन्। नेता साउँद सिँचाइमन्त्री भएको समयमा भुजेलाको बस्ती जोगाउनका लागि बनाइएको पाँच किलोमिटर तटबन्धको पनि उनले निरीक्षण गरेका छन्। 

पुर्ख्यौली घर डडेल्धुरा पुगेका नेता साउँद बाढी आएको थाहा पाउनेबित्तिकै कञ्‍चनपुर पुगेका थिए। उनले स्थानीयलाई सतर्कता अपनाउनसमेत आग्रह गरेका छन्।