सुदूरपश्‍चिममा बाढी पहिरोमा ६७ जना फसे

धनगढी- आइतबारदेखिको लगातार वर्षासँगै सेती नदीमा आएको बाढीमा ६० जना फसेका छन्। बैतडीको सिगास गाउँपालिका–५, ढुंगाडमा सेती नदीको छेउमा बस्दै आएका १० परिवारका ६० जना फसेको बताइएको छ। 

गाउँपालिकाका प्रवक्ता एवम् वडा नम्बर ५ का अध्यक्ष रामबहादुर धामीले बस्तीको चारैतिर नदी बगिरहेको र बीचमा ६० जना फसेको बताए। प्रवक्ता धामीले उनीहरुको उद्धारका लागि प्रदेश सरकारसंग छलफल भइरहेको बताए। 

ढुंगाडस्थित सेती नदीको किनारमा एक सय २० परिवार बस्दै आएका छन् उनले भने, ‘अधिकांश बाढीको जोखिम हुने भन्दै राति नै सुरक्षित स्थानमा सरेका छन्। उनीहरुलाई विद्यालयमा राखिएको छ।’

उनीहरुको उद्धारका लागि वडा नम्बर ८ मा रहेको सिवलिङ प्रहरी चौकीबाट प्रहरी टोली घटनास्थलतर्फ गइरहेको जिल्ला प्रहरी कार्यालय बैतडीका प्रमुख प्रहरी नायव उपरीक्षक रमेश सिह पालले बताए।

उता, कञ्चनपुरको भीमदत्त नगरपालिका–९ खल्ला मसेट्टीमा ५ जना महाकाली नदीमा फसेका छन्। 

लगातारको वर्षाले नदीको एक भँगालो पूर्वतर्फबाट बग्न थालेपछि ५० वर्षीय गौरी खड्का, ३६ वर्षीय पुष्कर नायक, ३२ वर्षीय शान्ति नायक, १० वर्षका अजय नायक र ४ वर्षीय सुरज नायक फसेको  जिल्ला प्रहरी कार्यालय कञ्चनपुरका प्रहरी नायव उपरीक्षक सिद्धराज न्यौपानेले बताए।

यता, कैलालीको मोहन्याल गाउँपालिका–४ खिमडीमा दुई जना फसेको जिल्ला प्रशासन कार्यालय कैलालीले जनाएको छ। उनीहरुको उद्धारको प्रयास भइरहेको सूचना अधिकारी शिवराज जोशीले बताए।