पोर्चुगलविरुद्ध भिड्दै उरुग्वे : स्वारेजले रोक्लान रोनाल्डोलाई ?

काठमाडौं- विश्वकप फुटवबल प्रतियोगिता अन्तर्गत आजबाट सुरु हुने प्रि–क्वाटर फाइनलको दोस्रो खेलमा पोर्चुगलविरुद्ध उरुग्वे मैदानमा उत्रिदै छ । 

समुह ए को विजेता उरुग्वे र समुह बी को उपविजेता पोर्चुगलबीचको खेल नेपाली समयअनुसार शनिबार राती पौने १२ बजे हुनेछ । दुबै देश एक अर्कालाई हराउने रणनीतिमा छन् । 

आजको खेलमा पोर्चुगललाई रोक्न उरुग्वेले ठूलै संघर्ष गर्नुपर्ने देखिन्छ । निकै लयका देखिएका पोर्चुगलका कप्तान क्रिस्टियानो रोनाल्डो उरुग्वेका लागि सबैभन्दा ठूलो बाधक बन्न सक्छन् । रोनाल्डोले जारी विश्वकपको ३ खेल खेल्दा ४ गोल गरिसकेका छन् । 

दुई पटक विश्वकप जितेको उरुग्वेलाई रोक्नु युराेकप विजेता पोर्चुगलका लागि पनि ठूलै चुनौती देखिन्छ । समुह चरणका सबै खेल जितेर आएको उरुग्वेको लय तोड्न पोर्चुगलले कडा मेहेनत गर्नुपर्ने देखिन्छ । उरुग्वेसंग लुइस स्वारेज र एडिन्सन काभानी जस्ता स्ट्राइकर छन् ।
 
पोर्चुगल र उरुग्वेबीच अहिलेसम्म दुईपटक भेट भएको छ । पोर्चुगलले एकपटक जितेको छ भने एकपटक बराबरी भएको छ । पछिल्लोपटक सन् १९७२ मा यी दुईबीच भएको खेल १-१ को बराबरीमा टुंगिएको थियो । त्यसैगरी, सन् १९६६ मा पोर्चुगलले उरुग्वेलाई ३-० ले हराएको थियो ।