महाकालीमा फसेका पाँचजनालाई सेनाको हेलिकप्टरबाट उद्धार गरिँदै

धनगढी– महाकाली नदीमा फसेका ५ जनालाई नेपाली सेनाको हेलिकप्टरबाट उद्धार गरिने भएको छ। गृहमन्त्री बालकृष्ण खाणको निर्देशनमा नेपाली सेनाको सुर्खेतस्थित स्टेसनबाट बाढीपहिरोमा परेकाहरुको उद्धारका लागि हेलिकोप्टर गएको मन्त्रालयको विपद् व्यवस्थापन महाशाखाले जनाएको छ। 

कञ्चनपुरको भीमदत्त नगरपालिका–९ खल्ला मसेट्टीस्थित महाकालीमा पाँच जना फसेका छन्। उनीहरू बाढीका कारण पूर्णागिरी मन्दिरको फेदमा रहेको टापुमा थुनिएको बताइएको छ। मसेट्टीका स्थानीयले उक्त क्षेत्रमा कुखुरा पालन गरेर बस्ने गरेका थिए। लगातारको वर्षाले नदीको एक भँगालो पूर्वतर्फबाट बग्न थालेपछि उनीहरू फसेको  जिल्ला प्रहरी कार्यालय कञ्चनपुरका प्रहरी नायब उपरीक्षक सिद्धराज न्यौपानेले बताए।

महाकाली नदीमा पानीको वहाव निरन्तर बढ्ने क्रममा छ। ‘सोमबार बिहान महाकालीमा पानीको वहाव ५ लाख २ हजार क्युसेक मापन गरिएको छ’, उनले भने, ‘जुन यो वर्षकै सबैभन्दा बढी हो। बाढी अझै बढ्ने क्रम जारी छ।’

महाकाली नदीमा पानीले खतराको सतह नाघेपछि भारतको बनबासा जोड्ने शारदा ब्यारेजमा आवागमनमा रोक लगाइएको छ। शारदा ब्यारेजमा सवारीसाधन र मानिसको आवागमनलाई पूर्ण रुपमा रोक लगाइएको उनले बताए।

आइतबारदेखि परेको लगातारको वर्षाले कैलाली, कञ्चनपुर, डडेल्धुरा, डोटीमा बढी क्षति पु¥याएको छ।