अर्जेन्टिना र फ्रान्सको भिडन्त आज : कसले मार्ला बाजी ? 

काठमाडौं- रुसमा जारी फिफा विश्वकप फुटबल प्रतियोगितामा शनिबार (आज) बाट प्रि–क्वाटर फाइनलका खेलहरु सुरु हुँदैछन् ।

प्रि–क्वाटरफाइनलको पहिलो खेलमा आज समुह डी को उपविजेता अर्जेन्टिना र समुह सीको विजेता फ्रान्स भिड्दै छन् । काजान रङ्गशालामा हुने यी दुई देशबीचको खेल नेपाली समयअनुसार बेलुकी पौने ८ बजे हुनेछ । 

उपाधी दाबेदार मानिएका दुई देशबीचको भिडन्त रोचक हुने अनुमान गरिएको छ । आजको खेलमा अर्जेन्टिनाका लियोनल मेसी, एन्जेल डी मारिया, हिग्वेन लगायतका खेलाडीको जादु कस्तो चल्ने हो त्यो प्रतिक्षाको विषय बनेको छ । यता फ्रान्सका लागि पल पोग्वा, एन्टोनी ग्रिजम्यानले कस्तो खेल्छन् त्यो धेरैको चासोको विषय बनेको छ । 

आजको खेल जित्नका लागि अर्जेन्टिनाले कडा मेहेनत गर्नुपर्ने देखिन्छ । अन्तिम १६ अन्तर्गतको पहिलो खेलमा भेट हुने फ्रान्स र अर्जेन्टिना दुवैले अहिलेसम्म प्रतियोगितामा आफ्नो छविअनुसार प्रदर्शन गर्न सकेका छैनन् ।

फ्रान्स र अर्जेन्टिनाबीच अहिलेसम्म ११ पटक भेट भएको छ । जसमा ६ पटक अर्जेन्टिना विजयी भएको छ भने फ्रान्स जम्मा २ पटक विजयी भएको छ । ३ खेल बरारबरीमा टुङ्गिएको छ । पछिल्लोपटक सन् २००९ मा यी दुईबीच भएको मैत्रीपूर्ण खेलमा अर्जेन्टिनाले फ्रान्सलाई २–० ले हराएको थियो ।