किसानलाई वर्षाले पारेको समस्याप्रति कांग्रेस नेता साउँदको ध्यानाकर्षण

काठमाडौं- नेपाली कांग्रेसका नेता एनपी साउँदले तीन दिनदेखिको अविरल वर्षाका कारण आएको बाढीले ठूलो धनजनको क्षति गरेको उल्लेख गर्दै उद्धार र राहतमा खटिन ध्यानाकर्षण गराएका छन्।

गृह जिल्ला कञ्चनपुर रहेका नेता साउँदले सुदूरपश्चिम र देशभरि भएको अविरल बेमौसमी वर्षाका कारण गम्भीर रुपमा धनजनको क्षति भएको उल्लेख गरेका छन्। मंगलबार बिहान सामाजिक सञ्जाल फेसबुकमार्फत महाकाली नदी र अन्य  प्रमुख नदीहरुको जलस्तर खतराभन्दा माथि पुगेको उल्लेख गर्दै उनले सरकार, प्रशासन र अन्य सम्बन्धित निकायमा उद्धार, राहत, क्षतिपूर्ति र पुनर्निर्माणका लागि ध्यानाकर्षण गराएका छन्।

महाकाली पारीको दोधारा चाँदनीमा बाढीको थप जोखिम बढेकोसमेत उनले जनाएका छन्। किसानले प्रमुख अन्नबाली धान भित्र्याउने बेला भएको यो संकटले अन्य अन्नबालीमा पनि क्षति पुग्न गएको र निरन्तरको वर्षाले बाढीको थप जोखिम सिर्जना गरेको उनले जनाएका छन्।

अहिले महाकाली नदीले सतर्कता तह पार गरिसकेको छ।