प्रदेश १ मा सवारी दुर्घटना : १२ दिनमा १७ जनाको मृत्यु

विराटनगर– प्रदेश १ मा पछिल्लो १२ दिनमा सवारी दुर्घटनामा परि १७ जनाको मृत्यु भएको छ । असोज २१ देखि सोमबार सम्म तेहृथुम बाहेकका १३ जिल्लामा भएका १५६ वटा सवारी दुर्घटनामा १७ जनाका ज्यान गएको १ नम्वर प्रदेश प्रहरी कार्यालय विराटनगरले जनाएको छ।

मृत्यु हुनेमा १६ पुरुष र १ महिला रहेका छन् ।  दुर्घटनामा परि गम्भीर घाइते ५३ र सामान्य घाइेत २ सय ४३ जना रहेका छन् । दशैं सुरु भएको ११ औं दिनसम्म प्रदेशको सबैभन्दा बढी दुर्घटना मोरङमा भएको ट्राफिक प्रहरीको अभिलेखमा देखिन्छ । मोरङमा दुर्घटना संख्या बढी देखिए पनि मुत्यु हुनेको संख्या कम रहेको छ ।

५३ वटा दुर्घटना भएको मोरङमा चार जनाको मृत्यु भएको छ । सुनसरीमा ४८ वटा दुर्घटनामा परि ५ जनाले ज्यान गुमाएका छन् । झापामा २३ वटा दुर्घटनामा परि ४ जनाको मृत्यु भएको प्रदेश प्रहरीले जनाएको छ ।

उदयपुरमा १४ वटा दुर्घटना भएको छ । संखुवासभामा ७ वटा दुर्घटनामा परि ४ जनाको मृत्यु भएको छ । इलाममा एउटा दुर्घटनामा एक जनाको मृत्यु भएको छ । उदयपुर, धनकुटा, पाँचथर, ताप्लेजुङ, भोजपुर, खोटाङ, ओखलढुंगा र सोलुखुम्बुमा भएको दुर्घटनामा मानविय क्षति नभएको प्रहरीले जनाएको छ । १२ दिनको अवधि भित्रमा तेहृथुममा कुनै दुर्घटना नभएको प्रदेश प्रहरीले जनाएको छ ।