बंगलादेशमा फेरि अर्को हिन्दू मन्दिर तोडफोड, ज्यादतीविरुद्ध भोकहडताल घोषणा

ढाका– बंगलादेशमा फेरि अर्को हिन्दू मन्दिरमा तोडफोड गरिएको छ। अल्पसंख्यक हिन्दू समुदायको आस्थामाथि एकपछि अर्को हमला भइरहेका बेला आइतबार अज्ञात मुस्लिम आक्रमणकारीहरुले हिन्दू मन्दिरमा तोडफोड गरेका हुन्। आक्रणकारीले राजधानी ढाकाबाट १५७ किलोमिटर टाढा रहेको हिन्दू मन्दिर तोडफोड गरेर त्यहाँ भएको नगद लुटेका हुन्।  

गत बुधबार दुर्गा पूजाका क्रममा मुसलमानहरुले हिन्दू मन्दिरमा आक्रमण गरेपछि हिंसा भड्किएको थियो। हिन्दू आस्थामाथि भएको हमलाको विरोधमा आइतबार प्रदर्शनमा उत्रिएका हिन्दूमाथि मुसलमानले हमला गरेका थिए।  दोहोर झडपमा एक प्रहरी अधिकारीसहित ४० जना घाइते भएका थिए।

मुस्लिम समूहले विभिन्न मन्दिर र हिन्दूहरुको स्वामित्व भएका पसलमा आक्रमण गरी लुटपाट मच्चाएपछि सरकारले थप प्रहरी र अर्धसैनिक बल परिचालन गरेको थियो।

दुर्गा पूजा मनाउने क्रममा शनिबार दिनभर आक्रमणकारीले हिन्दू मन्दिर तोडफोड गर्नुका साथै हिन्दू धर्मावलम्बीलाई कुटपिट गरेका थिए। आक्रमणकारीले काली मन्दिरका ६ ओटा मूर्ति तोडफोड गरेका थिए।

यसैबीच, दुर्गा पूजाका क्रममा हिन्दूमाथि भएको हमलाको विरोधमा बंगलादेश हिन्दू बौद्ध क्रिस्चियन एकता परिषद्ले २३ अक्टोबरदेखि अनसन र भोकहडता घोषणा गरेको छ। ढाकाको साहबाघ र चटगाउँमा विरोध कार्यक्रम गरिने परिषद्का महासचिव राना दासगुप्ताले पत्रकार सम्मेलनमा जानकारी दिए।