कोसी किनारामा प्याराग्लाइडिङ खस्दा वडाध्यक्ष घाइते

विराटनगर– भेडेटारबाट उडेको प्याराग्लाइडिङ सप्तकोसी नदीको किनारामा खसेको छ। आइतबार दिउँसो भेडेटारबाट उडेको प्याराग्लाइडिङ पानी र तीव्र हावाका कारण कोसी किनारामा पुगेर खसेको हो।

प्याराग्लाइडिङमा उडिरहेका सुनसरी धरान–१ का वडाध्यक्ष ४८ वर्षीय रोशन अधिकारी घाइते भएका छन्। उनको बीपी कोइराला स्वास्थ्य विज्ञान प्रतिष्ठान धरानमा उपचार भइरहेको छ। उनको ढाडमा चोट लागेको उपचारमा संलग्न चिकित्सकहरूले बताएका छन्। 

प्याराग्लाइडिङ उडिरहेको समयमा मौसममा आएको खराबी र हावाहुरीसँगै पानी परेकोले धरानमा अवतरण गर्न नसकेर उदयपुरको बेलका नगरपालिका–८ लाहुरे खोच नजिकैको सप्तकोसी नदीको किनारामा प्याराग्लाइडिङ खसेको इलाका प्रहरी कार्यालय रामपुर ठोक्सिलाले जनाएको छ।