मोरङमा चाडपर्व लक्षित १६ सय प्रहरी परिचालन

विराटनगर– मोरङमा चाडपर्व लक्षित गरेर १ हजार ६ सय बढी प्रहरी परिचालन गरिएको छ ।

धार्मिक तीर्थस्थल, भीडभाड बढी हुने स्थान, बैङ्क तथा वित्तीय संस्था, सार्वजनिक स्थल, अपराधिक घटना धेरै हुनसक्ने सम्भावित स्थानको सुरक्षा व्यवस्था कडा पारेर लगिएको मोरङका प्रमुख जिल्ला अधिकारी काशीराज दाहालले बताए । उनका अनुसार चाडपर्वलाई लक्षित गर्दै नेपाल र सशस्त्र प्रहरी गरेर एक हजार छ सय भन्दा बढी सुरक्षाकर्मी परिचालन गरिएको छ ।
 
दशैंमा विभिन्न मठमन्दिर, शक्तिपीठ र धार्मिक तीर्थस्थलहरुमा अत्याधिक भीडभाड हुनसक्ने अवस्थालाई मध्यनजर गर्दै प्रशासन सक्रिय बनेको दाहालले बताए । कोरोना महामारीको जोखिम कायम रहेको उल्लेख गर्दै प्रशासनले बिना भीडभाड र स्वास्थ्य सुरक्षा मापदण्डको पालना गरेर चाडपर्व मनाउन सबैमा आग्रह गरेको हो ।  
 
चाडपर्वको मौका छोपेर व्यापारीले सामानको मूल्यवृद्धि गर्ने र कालोबजारीलाई प्रश्रय दिनसक्ने अवस्थालाई मध्यनजर गर्दै कारबाही अघि बढाइएको प्रजिअ दाहालले बताए । सामान खरिद गर्दा ठगिएमा वा बजार मूल्यभन्दा बढी पैसा तिर्नु परेमा तत्काल प्रशासनलाई जानकारी गराउन उनले उपभोक्तालाई आग्रह गरेका छन् ।

मोरङ प्रहरी प्रमुख एसपी जनार्दन जिसीले चाडपर्वलाई मध्यनजर गर्दै प्रदेश १ को राजधानी विराटनगरसहित सबै स्थानको सुरक्षा व्यवस्था कडा पारिएको जानकारी दिए । ‘अपराधिक घटना हुनसक्ने सम्भावित स्थानलाई लक्षित गरेर प्रहरीले निगरानी बढाएको छ,’ उनले भने, ‘शङ्कास्पद व्यक्तिहरु माथि सोधपुछ र सवारी साधनको चेकजाँचलाई बढाइएको छ ।’
 
अपराधिक घटना हुन नदिन सबै स्थानमा प्रहरी उपस्थिति बढाइएको बताउँदै एसपी जिसीले चाडपर्व लक्षित सुरक्षा सतर्कता अपनाइएको जानकारी दिए । सम्भावित अपराध नियन्त्रणका लागि सादा पोशाकसहित प्रहरीको विशेष टोली परिचालन गरिएको उनले बताए ।
 
जिसीका अनुसार सुरक्षा व्यवस्था कडा बनाउँदै नियमित ठूलो सङ्ख्यामा प्रहरी परिचालन गर्ने काम भइरहेको छ । प्रहरीले नियमित गस्ती र पेट्रोलिङ गरिरहेको उनले बताए ।

सुनसरीमा १ हजार २७ जना प्रहरी परिचालन

सुनसरीमा चाडपर्वलाई लक्षित गरेर १ हजार २७ जना प्रहरी परिचालन गरिएको छ ।

सुनसरीका प्रहरी प्रमुख एसपी सञ्जयसिंह थापाका अनुसार सादा पोसाक, पिकेट टोली, पैदल गस्ती, सप्राइज चेकिङ, राजमार्ग सुरक्षा, ट्राफिक व्यवस्थापन, धार्मिक क्षेत्रको सुरक्षा र व्यवस्थापन, यातायात सुरक्षा र व्यवस्था र विभिन्न सरकारी कार्यालयको सुरक्षा गरी जिल्लाभर १ हजार २७ जना प्रहरी परिचालन गरिएको छ ।

चाडपर्वको बेलामा हुन सक्ने आपराधिक गतिविधिलाई नियन्त्रण तथा न्यूनीकरण गर्नका लागि असोज १ गते देखिनै सो संख्यामा प्रहरी परिचालन गरिएको एसपी थापाले बताए ।