बेल्जियम र इङ्ल्यान्डबीच अब्बलताको अग्‍निपरीक्षा 

काठमाडौं- ६ पटक आमनेसामने हुँदा इङ्ल्यान्डसँग हार व्यहोरेको बेल्जियम, आज बद्ला लिने दाउमा छ । जारी विश्वकपमा उपाधिको दाबेदार मानिएका इङ्ल्यान्ड र बेल्जियमले यसपटक विश्वकपको एउटै समूहमा रहेर दमदार शुरुवात गरिरहेका छन् । 

दुवै टोलीले विपक्षी टिमविरुद्ध समान ८ गोल गरे भने दुई गोल खाँदै दमदार शुरुवात गरेका हुन । दुवै टोलीले समान ८ गोल गर्दा बेल्जियमका रोमेलु लुकाकु र इङ्ल्यान्डका ह्यारी केनको उच्च प्रदर्शन रहेको छ । यही समान विशेषता भएको बेल्जियम र इङ्ल्यान्डबीच अब्बलताको अग्निपरीक्षा आज राति कलिनइनग्राड एरिनामा ११:४५ बजपेछि हुदैछ।

समूह चरणको पहिलो खेलमा इङ्ल्यान्डले ट्युनिसियामाथि २-१ को जित दर्ता गर्दा विश्वकपमा नवप्रवेशी पानामा माथि ६-१ को फराकिलो जित निकालेको थियो । जुन जारी विश्वकपमा अहिले सम्मकै उच्च अन्तर जित हो । यसै खेलमा कप्तान ह्यारी केनले कीर्तिमानी ह्याट्रिक पूरा गरे। यही समूहमा रहेको बेल्जियमले पहिलो खेलमा पानामामाथि ३-० र ट्युनिसियामाथि ५-२ को सहज जित निकाल्दै समूहमा आफु पनि बलियो रहेको दावेदारिता प्रस्तुत गर्‍यो। 

अन्तिम १६ मा प्रवेश गरिसकेका यी दुइ टिमबीचको खेल निकै रोमाञ्चक र प्रतिस्पर्धात्मक हुने अपेक्षा गरिएको छ। तर, यी दुई टिमबीचको आजको खेलले समूह विजेता निर्धारण गर्नेछ । दुवै टोलीमा सबै पक्ष बलियो देखिएको छ। तर, डेल अलीको चोट इङ्ल्यान्डलाई घातक बन्न सक्नेछ। उच्च लयमा रहेको केन र लुकाकुमध्ये आजको खेलमा कसले गोल गर्ने हो त्यो भने हेर्न बाँकी छ।

यी दुई टिम अहिलेसम्म ६ पटक आमनेसामने हुदा इङ्ल्यान्ड नै हावी देखिएको छ। ४ खेल बराबरीमा सकिदा दुई खेलमा इङ्ल्यान्ड विजयी भएको छ । इङ्ल्यान्ड यही प्रदर्शनलाई निरन्तरता दिने लक्ष्यमा हुनेछ भने, बेल्जियम इङ्ल्यान्डसँगको हारको श्रृङ्खलालाई तोड्ने योजनामा हुनेछ। १९५४ को विश्वकपमा यि दुई टिमले अतिरिक्त समयमा ४-४ गोलको बराबरी खेलेको थियो । १९८० को युरोकपमा १-१ गोलको बराबरी खेलेका थिए। १९९० को विश्वकप र १९९८ को मैत्रीपूर्ण खेल भने गोलरहित बराबरीमा सकिएको थियो । त्यसयताका दुवै भेटमा इङ्ल्यान्डले बाजी मारेको थियो। पछिल्लोपटक यि दुई टिमले २०१२ मा मैत्रीपूर्ण खेलमा इंग्ल्यान्ड १-० ले विजयी भएको थियो ।

यही समूहमा पानामा र ट्युनिसियाले प्रतिष्ठाको लागि अन्तिम खेल खेल्दैछ । नवप्रवेशी पानामा रसिया विश्वकपलाई यादगार बनाउन ट्युनिसियालाई पराजित गर्दै घर फर्कने योजनामा हुनेछ । यता, टयुनिसियापनि अन्तिम खेलमा जित हात पार्ने लक्ष्यमा रहनेछ।