प्रदेश १: प्रदेशसभा बैठक १२ दिनका लागि स्थगित

विराटनगर- सोमबार दिउँसो १ बजेबस्‍ने गरी आइतबारको बैठक स्थगित गरेका प्रदेश १ का सभामुख प्रदीपकुमार भण्डारीले कात्तिक ५ गते बस्‍ने गरी बैठक स्थगित गरेका छन्।

प्रदेशसभा सचिवालयले विशेष कारण देखाएर बैठक स्थगित गरेको जनाएको छ। कात्तिक ५ गते दिउँसो १ बजे बैठक बस्‍ने गरी असोज २५ गतेको बैठक स्थगित गरिएको प्रदेशसभा सचिवालयका सचिव गोपालप्रसाद पराजुलीले बताए।

 मुख्यमन्त्री भीमप्रसाद आचार्यले विश्वासको मतका लागि प्रस्ताव लिनुपर्ने संवैधानिक बाध्यता छ। आचार्य दसैंपछि विश्वासको मत लिने योजनामा थिए। 

विपक्षी दल दसैंको विदा नभनी निरन्तर प्रक्रियामा लगेर टुंगोमा पुग्नुपर्ने अडानमा थिए। 

प्रदेशसभाको नवौं तथा हिउँदे अधिवेशन असोज २२ गते सुरु भएको थियो। आइतबारको बैठकमा प्रदेश सरकार र सभामुख भण्डारीको आलोचना गरिएको थियो। 

संविधान र कानुन विपरित सरकारले संविधानको गलत व्याख्या गर्ने र त्यसमा सभामुखले सहयोग गरेको भन्दै विपक्षी दलले आरोप लगाएका थिए।