प्रहरी हिरासतमा मृत्यु भएका युवकको छानबिन गर्न समिति गठन

विराटनगर- सुनसरी प्रहरीको हिरासतमा मृत्यु भएका युवकको छानबिनका लागि समिति गठन गर्न पीडित पक्ष सहमत भएको छ। 

सहायक प्रमुख जिल्ला अधिकारी महेश पोखरेलको संयोजकत्वमा छानबिन समिति गठन गर्ने र क्षतिपूर्तिको लागि गृह मन्त्रालयमा सिफारिस गर्ने सहमति भएपछि मृतक परिवारले शव बुझेर लगेका छन्। 

छानबिन समितिको संयोजकमा सहायक सीडीओ महेश पोखरेल, जिल्ला प्रहरी कार्यालयका डीएसपी नरेन्द्र कार्की, भोक्राहा नरसिंह गाउँपालिका अध्यक्ष, इनरुवा, भोक्राहा नरसिंहका वडाध्यक्ष सदस्य छन्।  

प्रेम विवाह गरेका भोक्राहा नरसिंह गाउँपालिका ५ का २५ वर्षीया हकिब मियाँलाई प्रहरीले नियन्त्रणमा लिएर अभद्र व्यवहार मुद्दा चलाएको थियो। उनको हिरासतभित्रै पासो लगाएको अवस्थामा शव भेटिएपछि सुनियोजितरुपमा हत्या भएको भन्दै आफन्तजन तथा स्थानीयले आइतबार प्रर्दशन गरेका थिए। 

जिल्ला प्रहरी कार्यालयअघि प्रर्दशनको क्रममा प्रहरीसँग झडपसमेत भएको थियो। प्रर्दशनकारीले इनरुवा बजार बन्द गराएका थिए भने पूर्वपश्चिम राजमार्ग पनि अवरुद्ध गरेका थिए।