प्रदेश १ सरकारले संविधानको गलत व्याख्या गरेको विपक्षीको आरोप

विराटनगर– प्रदेश १ का विपक्षी दलले सरकारले संविधानको गलत व्याख्या गरेको आरोप लगाएका छन्। प्रदेश सभाको नवौं तथा हिउँदे अधिवेशनअन्तर्गत आइतबारको बैठकमा संविधान र कानुनविरीत सरकारले संविधानको गलत व्याख्या गरेको र त्यसमा सभामुखले सहयोग गरेको आरोप लगाए। कार्यकर्तालाई विभिन्न नियुक्ति दिलाउन सरकारले आयु लम्ब्याउन चाहेको आरोप उनीहरुले लगाए। 

मुख्यमन्त्रीले प्रतिनिधित्व गरेको दल विभाजित भए ३० दिनभित्र विश्वासको मत लिनुपर्ने संवैधानिक प्रावधानलाई आफू अनुकूल व्याख्या गरिरहेको विपक्षी दलका नेताहरुले बताएका छन्। 

नेकपा माओवादी केन्द्र संसदीय दलका नेता इन्द्रबहादुर आङ्बो र नेकपा एकीकृत समाजवादी संसदीय दलका नेता राजेन्द्र राईले विशेष समय लिएर बोल्दै सरकार निर्लज्ज बनेर आयु लम्ब्याउन लागेको र त्यसमा सभामुखले साथ दिएको बताए।

नेता आङबोले सत्तापक्षलाई संविधान बमोजिम विश्वासको मत लिएर मात्र सरकार चलाउन अन्यथा मार्ग प्रशस्त गर्न आग्रह गरे। समाजवादी दलका नेता राजेन्द्र राईले कार्यव्यवस्था परामर्श समितिको बैठक नबोलाईकनै संसद बैठक आह्वान गरिएको भन्दै आपत्ति जनाए।

 बैठकले केही प्रदेश ऐनलाई संशोधन गर्न बनेको विधेयक २०७८ दफावार छलफलका लागि न्याय प्रशासन तथा विधायन समितिमा पठाएको छ। सभामुख प्रदीपकुमार भण्डारीले सोमबार एक बजेका लागि संसद् बोलाएका छन्।