जर्मनीको जोगिएन साख : ८० वर्षपछि समूह चरणबाटै बाहिर

काठमाडाैं- सन् २०१४ को विश्वकप विजेता जर्मनी विश्वकप २०१८ को समूह चरणबाटै बाहिरिएको छ । समूह एफको अन्तिम खेलमा दक्षिण कोरियासँग २–० गोलले पराजित भएपछि जर्मनी विश्वकपबाट बाहिरिएको हो ।

नकआउट चरणमा जान जर्मनीलाई जीत आवश्यक थियो तर समूह चरणका दुवै खेलमा पराजित भएको दक्षिण कोरियाविरुद्ध उसले एक गोल पनि गर्न सकेन । दक्षिण कोरियाले दुवै गोल इन्जुरी समयमा गरेको हो । 

नियमित ९० मिनेटको समयमा कोरियाले जर्मनीलाई गोलरहित बराबरीमा रोकेको थियो । जर्मनीको स्ट्राइकरहरुले एकोहोरो दवाव दिए पनि गोल गर्न असमर्थ रहे । तर, थपिएको समयमा लगातार दुई गोल गर्दै कोरियाले जर्मनीलाई नमिठो हार चखायो । 

कोरियाका लागि पहिलो गोल किम युङगोनले थपिएको समयको तेस्रो मिनेटमा गरे भने दोस्रो गोल सङ हिउनमिनले थप भएको समयको छैठौँ मिनेटमा गोल गरेका थिए ।

जर्मनी सन् १९३८ पछि पहिलोपटक समूहचरणबाटै बाहिरिएको हो ।  ८० वर्षपछि जर्मनीको फुटबल इतिहासमा नमेटिने दाग लागेको छ । 

यो संगै जर्मनी साविक विजेताको रुपमा समूह चरणबाटै घर फर्कने लगातार तेस्रो विश्व च्याम्पियन बनेको छ ।

सन् २००६ को विजेता इटाली २०१० मा, २०१० को विजेता स्पेन २०१४ को विश्वकपमा समूह चरणबाटै घर फर्किएका थिए । त्यस्तै सन् १९९८ को विश्वकप विजेता फ्रान्स पनि सन् २००२ को विश्वकपमा समूह चरणबाटै बाहिरिएको थियो।