ब्राजिल विजेता र स्विट्जरल्याण्ड उपविजेता बन्दै नकआउट चरणमा

काठमाडौं- पाँच पटकको विश्व विजेता ब्राजिल र स्विट्जरल्याण्ड विश्वकप फुटबलको नकआउट चरणमा प्रवेश गरेका छन् । 

बुधबार राती भएको समुह 'ई' को अन्तिम खेलमा ब्राजिलले सर्वियालाई २-० गोलअन्तरले हराउँदा स्विट्जरल्याण्डले कोष्टारिकासँग २-२ गोलको बराबरी खेल्दै नकआउट चरणमा प्रवेश गरेका हुन् । 

समुहको अन्तिम खेलमा ब्राजिलले सर्वियालाई दुई शुन्यले हराउदै समुह विजेताका रुपमा अन्तिम १६ मा स्थान बनायो । प्रतिस्पर्धात्मक खेलको पहिलो आधा घण्टा ब्रजिलले सर्वियासँग गोल रहित बराबरी खेलेको थियो । खेलको ३६ औं मिनेटमा पउलिन्होको गोल मार्फत ब्रजिलले अग्रता लियो ।

पहिलो हाफमा एक गोलको अग्रता बनाएको ब्राजिलले दोस्रो हाफमा झन आक्रामक खेल्यो । दोस्रो हाफको ६८ औं मिनेटमा ब्राजिलले अन्तर दुई शुन्यमा पुर्यायो । नेयमारको कर्नरमा थिएगो सिल्भाले हेडर गोल गरे । त्यसपछि सर्विया खेलमा फर्कन निकै प्रयास गरेको थियो तर सफल हुन सकेन ।

समुह विजेता बनेको ब्राजिलले अब प्रिक्वाटरफाइनलमा मेक्सिकोसँग खेल्नेछ ।

यसै समूहअन्तर्गत अर्को खेलमा स्वीट्जरल्यान्डले कोष्टारिकासँग २–२ गोलको बराबरी खेल्दै नकआउट चरणमा प्रवेश गरेको छ ।

समुह उपविजेता बनेको स्वीट्जरल्यान्डका लागि खेलको ३१औं मिनेटमा ब्लेरिम जेमइलीले गोल गर्दै अग्रता दिलाएका थिए । तर, खेलको ५६औं मिनेटमा केन्डल वास्टनले गोल गर्दै कोष्टारिकालाई बराबरीमा पुर्याएका थिए ।

खेलको ८८औं मिनेटमा स्वीट्जरल्यान्डले गोल गर्दै २–१ गोलको अग्रता बनाएको थियो । तर खेलको अन्तिम समयमा स्वीट्जरल्यान्डका यान सोमेरले आत्मघाती गोल गरेपछि कोष्टारिकासँग २–२ गोलको बराबरी खेलेको हो ।

अब स्विजरल्याण्डले प्रि–क्वाटरफाइनलमा समुह 'एफ' को विजेता स्विडेनसंग खेल्नेछ ।