भैरहवालाई हराएर पोखरा राइनोज ईपीएलको फाइनलमा

काठमाडौं– एभरेष्ट प्रिमियर लिग (ईपीएल) क्रिकेट प्रतियोगिता अन्तर्गत बिहीबार भएको दोस्रो क्वालिफायर खेल पोखराले जितेको छ। 

त्रिवि अन्तर्राष्ट्रिय क्रिकेट मैदानमा भएको खेलमा पोखराले भैरहवामाथि ७ विकेटले जित निकालेको हो। टस हारेर पहिले ब्याटिङ गरेको भैरहवाले निर्धारित २० ओभरमा ११९ रन बनाएको थियो। जितका लागि १२० रनको लक्ष्यसहित मैदान उत्रेको पोखराले १८.२ बलमा १२३ रन बनाउँदै लक्ष्य भेटाएको हो।

पोखराका लागि बायाँ हाते ब्याट्सम्यान सहान आराङ्गेले नटआउट ५३ रन बनाए। फितलो ब्याटिङ गरेको भैरहवाले फिल्डिङ समेत कमजोर गर्दा पोखराले सहज जित निकालेको हो। छोटो अवधिमै ३ विकेट गुमाएको पोखरा एक समय निकै दबाबमा परेको थियो। त्यसपछि भैरहवाका फिल्डरले लागातार एकपछि अर्को गर्दै ३ क्याच ड्रप गरेपछि पोखरालाई जित सहज भएको हो। 

प्रतियोगिता अन्तर्गत शनिबार फाइनल खेल हुने छ। शनिबार चितवन र पोखराले फाइनल खेल्नेछन्। फाइनल जित्नेले ५० लाख नगदसहित ट्रफी जित्ने छ।