दसैंपछि संसदमा निष्कर्ष निकालौंला, ठण्डा भएर आउनुहोस् : मुख्यमन्त्री आचार्य

विराटनगर– प्रदेश १ का मुख्यमन्त्री भीमप्रसाद आचार्यले दसैंपछि मात्र संसदमा निष्कर्ष निकालिने बताएका छन्। प्रदेशसभामा कसैको पनि स्पष्ट बहुमत नरहेको र बहुमत पुर्याएर कसैले पनि दाबी नगरेकाले संसदमा दसैंपछि मात्रै निष्कर्ष निस्कने बताएका छन्। 

प्रदेशसभा भवनको उद्घाटन कार्यक्रम बुधबार मुख्यमन्त्री आचार्यले संविधान मिचेर सरकार अघि नबढ्ने स्पष्ट पारे। उनले भने, ‘दसैंपछि ठण्डा भएर आउन प्रदेशसभा सदस्यहरुलाई आग्रह छ।’ संसदमा कुनै पनि राजनीतिक दलको बहुमत नरेहकाले थपक्क कसैलाई दिन सक्ने अवस्था नरहेको उनको दाबी छ। सरकार संविधानअनुसार चल्ने र संविधान नमिच्ने उनको भनाइ छ।

मुख्यमन्त्री आचार्यले पार्टी फुट्दैमा गालीगलौजमा उत्रिहाल्ने अवस्था नरहेको बताए। उनले भने, ‘राजनीतिक मुद्दामा एकै ठाउँमा हुनुपर्ने अवस्था पनि आउन सक्ने कुरालाई ख्याल गर्नुहोस्।’ नेपाली कांग्रेसका प्रमुख सचेतक केदार कार्की, माओवादी केन्द्र दलका नेता इन्द्रबहादुर आङ्वो, नेकपा एकीकृत समाजवादी दलका नेता राजेन्द्र राई, जनता समाजवादी पार्टी दलका नेता जयराम यादवले मार्गप्रशस्त गर्न मुख्यमन्त्री आचार्यलाई आग्रह गरेका थिए।